ایرانی فوج نے قطرحملےمیں جاں بحق پائلٹ بریگیڈیئر جنرل مجید کاظمی کی شناخت کی تصدیق کر دی

تہران :ایرانی فوج نے ان چار پائلٹس میں سے ایک کی شناخت باضابطہ طور پر تصدیق کر دی ہے جن کے متعلق دعویٰ کیا گیا تھا کہ وہ مارچ کے مہینے میں قطر میں قائم امریکی ’العدید ایئر بیس‘ پر حملے کے دوران جاں بحق ہوئے تھے۔
بدھ کی صبح ملکی میڈیا میں جاری ہونے والے ایک سرکاری بیان میں اس بات کی وضاحت کی گئی کہ ’’بریگیڈیئر جنرل مجید کاظمی، جو کہ ایرانی فضائیہ کے ایس یو 24 طیارے کے پائلٹ تھے اور جنہوں نے قطر کے العدید اڈے پر ہونے والے حملے میں حصہ لیا تھا، ان کی شناخت ڈی این اے ٹیسٹ کے ذریعے مکمل کر لی گئی ہے اور ان کی باقیات کو جلد ہی (آئندہ چند گھنٹوں میں) وطن واپس لایا جا رہا ہے۔‘‘
خبر رساں ادارے ’فارس‘ کی جانب سے ایرانی جنگی طیارے اور اس کے پائلٹ کی ہلاکت سے متعلق تفصیلات بیان کرتے ہوئے بتایا گیا ہے کہ یکم مارچ کو ایرانی فضائیہ کے دو ایس یو 24 بمبار طیاروں نے ایک انتہائی جرات مندانہ کارروائی انجام دی تھی۔ ان طیاروں نے دشمن کے جدید ترین نگرانی کے نظاموں اور متعدد ریڈار تنصیبات کو کامیابی سے دھوکہ دے کر عبور کیا اور قطر میں واقع العدید ایئر بیس پر شدید بمباری کی۔تاہم، کارروائی کے بعد واپسی کے سفر کے دوران خلیج فارس کی فضائی حدود میں یہ ایرانی طیارے دشمن کے جوابی حملے کی زد میں آ گئے اور تباہ ہو گئے۔