کراچی :اسٹیٹ بینک آف پاکستان نے اگلے 50 دنوں کے لیے شرح سود 11.5 فیصد پر برقرار رکھنے کا اعلان کیا ہے۔ معاشی ماہرین اور مارکیٹ کے نمائندوں کی اکثریت کو یہی توقع تھی کہ مرکزی بینک کی جانب سے شرح سود میں کوئی تبدیلی نہیں کی جائے گی۔
رواں سال اپریل میں مشرقِ وسطیٰ میں بڑھتی ہوئی کشیدگی اور معاشی خدشات کے پیشِ نظر شرح سود میں 100 بیسس پوائنٹس کا اضافہ کیا گیا تھا، جس کے بعد جون کے اجلاس میں بھی اسے اسی سطح پر برقرار رکھنے کا فیصلہ کیا گیا تھا۔
The Monetary Policy Committee unanimously decided to keep the policy rate unchanged at 11.5 percent in its meeting held on July 27, 2026.
For details: https://t.co/7bQXQaJE5x pic.twitter.com/EyU267x0bL— SBP (@StateBank_Pak) July 27, 2026
پیر کو اسٹیٹ بینک کے گورنر جمیل احمد کی زیرِ صدارت ہونے والے مانیٹری پالیسی کمیٹی کے اجلاس میں ملک کی حالیہ معاشی صورتحال اور اہم معاشی اشاریوں کا تفصیلی جائزہ لیا گیا۔
ٹاپ لائن سیکیورٹیز کے ایک حالیہ سروے کے مطابق، 97 فیصد معاشی ماہرین نے توقع ظاہر کی تھی کہ پالیسی ریٹ میں کوئی تبدیلی نہیں کی جائے گی، جبکہ صرف 3 فیصد افراد کو 100 بیسس پوائنٹس کی کمی کی توقع تھی۔
اس وقت ملک کے زیادہ تر معاشی اشاریے بہتری کی سمت اشارہ کر رہے ہیں۔ مالی سال 2026 میں کرنٹ اکاؤنٹ خسارہ 136 ملین ڈالر تک محدود رہا ہے جو کہ ہدف کے مطابق ہے۔ اس خسارے کی بڑی وجہ ملک میں تجارتی سرگرمیوں کی بحالی کے باعث اشیاء کی واردات میں اضافہ ہے۔
اس کے علاوہ بھاری غیر ملکی قرضوں کی ادائیگیوں کے باوجود جون 2026 کے اختتام تک اسٹیٹ بینک اپنے زرِ مبادلہ کے ذخائر کو 18 ارب ڈالر کے ہدف تک برقرار رکھنے میں کامیاب رہا ہے۔ بیرونِ ملک مقیم پاکستانیوں کی جانب سے بھیجی جانے والی خطیر رقم بھی 41.6 ارب ڈالر کی تاریخی سطح پر پہنچ گئی ہے جس سے معیشت کو بڑا سہارا ملا ہے۔
مہنگائی کی صورتحال پر اعداد و شمار بتاتے ہیں کہ جون کے مہینے میں شرحِ افراطِ زر 11.1 فیصد رہی، جبکہ پورے مالی سال کے دوران اوسط مہنگائی تقریباً 7.05 فیصد رہی جو اسٹیٹ بینک کے مقرر کردہ ہدف کے بہت قریب ہے۔