سیالکوٹ ۔سلیم احمد اعوان شیخو
ایک دینی مدرسہ سے ایک طالب علم بیڑیوں سمیت فرار ہو گیا تو شہریوں نے پولیس کے حوالے کر دیا۔بتایا گیا ہے کہ سیالکوٹ کے ایک دینی مدرسہ میں زیر تعلیم طالب علم محمد طلحہ کے پاؤں میں بیڑیاں ڈال کر استاد اس پر تشدد کرتے تھے تو یہ طالب علم بیڑیوں سمیت مدرسہ سے فرار ہونے میں کامیاب ہو گیا تو شہریوں نے پولیس کے حوالے کر دیا۔ڈسٹرکٹ پولیس آفیسر سیالکوٹ، کیپٹن (ر) دوست محمد نے واقعہ کا فوری نوٹس لیتے ہوئے ایس ایچ او تھانہ کوتوالی انسپکٹر بشارت کو قانونی کارروائی کے احکامات جاری کر دئیے۔ایس ایچ او تھانہ کوتوالی نے تشدد کرنے والے استاد گرفتار کر لئے جبکہ متاثرہ طالب علم کو باحفاظت اس کے ورثاء کے حوالے کر دیا۔ پولیس نے اساتذہ کے خلاف مقدمہ درج کرکے تفتیش مکمل کرنے کے بعد ملزمان اساتذہ کو علاقہ مجسٹریٹ شہزادہ شاہ بہرام کی عدالت میں پیش کر کے جوڈیشل ریمانڈ پر جیل بھجوا دیا ہے۔