نئی دہلی :انڈیا کی وزارتِ پیٹرولیم نے پیٹرول پمپس کو ہدایت جاری کی ہے کہ وہ کسی بھی صارف کو ایک دن میں 200 لیٹر سے زیادہ ہائی اسپیڈ ڈیزل فروخت نہ کریں۔
نئے حکم نامے کے مطابق صنعتی، تجارتی اور ادارہ جاتی صارفین کو پیٹرول پمپس سے پیٹرول اور ڈیزل خریدنے سے روک دیا گیا ہے اور انھیں ہدایت دی گئی ہے کہ وہ اپنی ضرورت کا ایندھن بلک یا بڑی تعداد میں پیٹرولیم مصنوعات فروخت کے مراکز سے خریدیں۔
بی بی سی ہندی نے انڈین خبر رساں ادارے پی ٹی آئی کا حوالہ دیتے ہوئے بتایا ہے کہ اس پابندی کا اطلاق اگلے 90 روز تک ہو گا۔ پی ٹی آئی کی خبر کے مطابق ’یہ اقدام بعض علاقوں میں ڈیزل کی طلب میں غیر معمولی اضافے کے بعد اٹھایا گیا ہے، جہاں بلک صارفین قیمت کے فرق کی وجہ سے پیٹرول پمپوں سے ایندھن خریدنے لگے تھے۔‘
ڈیزل بلک میں زیادہ قیمت پر اُن ٹیلی کام ٹاورز اور بڑی صنعتوں کو فروخت کیا جاتا ہے جو بجلی پیدا کرنے یا دیگر ضروریات کے لیے ڈیزل استعمال کرتی ہیں۔
دہلی میں پیٹرول پمپوں پر ڈیزل کی قیمت 95.20 انڈین روپے فی لیٹر ہے، جبکہ بلک میں اس کی قیمت 134.50 روپے ہے۔
