لاہور: محکمہ موسمیات (PMD) نے ملک بھر میں شدید گرمی کی لہر (ہیٹ ویو) کا الرٹ جاری کر دیا ہے۔ بالائی فضا میں ہائی پریشر سسٹم کے قیام کے باعث ملک کے بیشتر میدانی علاقوں میں درجہ حرارت معمول سے 4 سے 6 ڈگری سینٹی گریڈ تک زیادہ رہنے کی توقع ہے، جس سے زندگی معمولات بری طرح متاثر ہو سکتے ہیں۔
سندھ میں پارہ 51 ڈگری تک جانے کا خدشہ
سندھ کے بالائی اضلاع شدید ترین گرمی کی زد میں ہیں۔ محکمہ موسمیات کے مطابق سکھر، شکارپور، قمبر شہدادکوٹ، جیکب آباد، لاڑکانہ، موہن جو دڑو، دادو، شہید بینظیر آباد، گھوٹکی، خیرپور اور نوشہرو فیروز میں درجہ حرارت 48 سے 51 ڈگری سینٹی گریڈ تک پہنچ سکتا ہے۔ جبکہ حیدرآباد، بدین، تھرپارکر اور میرپورخاص سمیت دیگر اضلاع میں درجہ حرارت 42 سے 45 ڈگری سینٹی گریڈ رہنے کا امکان ہے۔
لاہور اور کراچی کی صورتحال
لاہور: شہر شدید گرمی کی لپیٹ میں ہے جہاں درجہ حرارت 42 ڈگری ریکارڈ کیا گیا، جو آئندہ 24 گھنٹوں میں 43 ڈگری تک جا سکتا ہے۔ شہر کا ایئر کوالٹی انڈیکس 143 ریکارڈ کیا گیا ہے۔ محکمہ موسمیات نے 8 سے 11 جون تک ہیٹ ویو کا الرٹ جاری کیا ہے۔
کراچی: شہرِ قائد میں 9 سے 12 جون کے دوران درجہ حرارت 39 سے 42 ڈگری سینٹی گریڈ تک پہنچنے کا امکان ہے۔
حکومتی اقدامات اور ایس او پیز
شدید ہیٹ ویو کے پیشِ نظر تمام ڈپٹی کمشنرز اور ڈسٹرکٹ ڈیزاسٹر مینجمنٹ اتھارٹیز کو فوری طور پر ایس او پیز نافذ کرنے اور حفاظتی اقدامات اٹھانے کی ہدایت کی گئی ہے۔
شہریوں کے لیے احتیاطی تدابیر
محکمہ موسمیات نے عوام کو ہیٹ اسٹروک اور موسمی اثرات سے بچنے کے لیے درج ذیل ہدایات جاری کی ہیں:
دھوپ سے گریز: صبح 10 بجے سے شام 4 بجے تک بلا ضرورت گھر سے باہر نکلنے سے گریز کریں۔
ہائیڈریشن: پانی کا کثرت سے استعمال کریں اور خود کو ہائیڈریٹ رکھیں۔
خصوصی خیال: بچوں، خواتین، بزرگ شہریوں اور بیمار افراد کی صحت کا خصوصی خیال رکھیں۔
کسان حضرات: کاشتکاروں کو مشورہ دیا گیا ہے کہ وہ اپنی فصلوں اور مویشیوں کو شدید گرمی سے بچانے کے لیے فوری اور مناسب انتظامات کریں۔
حکام کی جانب سے شہریوں پر زور دیا گیا ہے کہ وہ موسم کی صورتحال کے پیشِ نظر احتیاط برتیں اور محکمہ موسمیات کی تازہ ترین اپ ڈیٹس سے آگاہ رہیں۔