ملتان(مہر آصف، بیورو چیف )
ملتان کے شیر شاہ ٹول پلازہ پر افسوسناک حادثے میں تین مزدور جاں بحق ہوگئے۔ ابتدائی اطلاعات کے مطابق مزدور لوہے کی سیڑھی کے ذریعے کام کر رہے تھے کہ سیڑھی اچانک ہائی وولٹیج بجلی کی تاروں سے ٹکرا گئی، جس کے نتیجے میں تینوں مزدور شدید کرنٹ لگنے سے موقع پر ہی جان کی بازی ہار گئے۔حادثے کی اطلاع ملتے ہی ریسکیو اور متعلقہ اداروں کی ٹیمیں موقع پر پہنچ گئیں اور ضروری کارروائی کے بعد لاشوں کو ہسپتال منتقل کر دیا گیا۔ واقعے کے بعد علاقے میں فضا سوگوار ہوگئی جبکہ جاں بحق افراد کی شناخت اور حادثے کی مزید وجوہات جاننے کے لیے تحقیقات شروع کر دی گئی ہیں۔عینی شاہدین کے مطابق مزدور معمول کے تعمیراتی کام میں مصروف تھے کہ اچانک پیش آنے والے اس حادثے نے تین خاندانوں کے چراغ گل کر دیے۔ متعلقہ حکام نے شہریوں اور تعمیراتی کارکنوں کو بجلی کی تنصیبات کے قریب کام کرتے وقت انتہائی احتیاط برتنے کی ہدایت کی ہے۔