نواب شاہ (رپورٹ نفیس آرائیں)
جیے سندھ قومی محاذ (شہید بشیر خان) کے چیئرمین ڈاکٹر نیاز کالانی نے کہا ہے کہ قاضی احمد میں محض 20 کلومیٹر کے فاصلہ پر ٹول ٹیکس کا نفاذ کسی بھی صورت قبول نہیں ہے۔ یہاں سڑکیں تباہ حالی کا شکار ہیں اور مسافروں کو کوئی سہولت میسر نہیں ہے۔ یہ ٹول ٹیکس صرف مخصوص مقامی لوگوں کو نوازنے اور عوام کو لوٹنے کے لئے لگایا گیا ہے۔ان خیالات کا اظہار انہوں نے پنھل ساریو، مجیب بھیلار، ناصر حسین شاہ، نظیر ڈاہری اور دیگر رہنماؤں کے ہمراہ تعلقہ پریس کلب قاضی احمد میں ایک پر ہجوم پریس کانفرنس سے خطاب کرتے ہوئے کیا۔ اس موقع پر ان کے ساتھ فقیر ساجن کنبھر، نجف بالادی، مہتاب لاکھو، جام سجاد انڑ، زاہد اوٹھو اور جام صدام انڑ بھی موجود تھے۔ڈاکٹر نیاز کالانی نے کہا کہ جسقم شہید بشیر خان سندھ کے قومی مسائل کے ساتھ ساتھ سماجی ناانصافیوں پر ہمیشہ آواز اٹھاتی رہی ہے۔ انہوں نے خبردار کیا کہ اگر قاضی احمد میں دوبارہ ٹول ٹیکس وصول کرنے کی کوشش کی گئی تو جسقم ٹول پلازہ کے سامنے شدید احتجاجی مظاہرہ کرے گی اور دھرنا دے گی، خواہ اس پاداش میں انہیں جیل ہی کیوں نہ بھیج دیا جائے۔ سندھ کے راستے تباہ ہیں اور ان سڑکوں کی ساری کمائی وفاق لے جاتا ہے۔