ڈپٹی کمشنر نے شہر میں جاری مختلف بیوٹیفیکیشن اور ترقیاتی منصوبوں کا دورہ کیا

سیالکوٹ (سلیم احمد اعوان شیخو) ڈپٹی کمشنر سیالکوٹ صبا اصغر علی نے شہر میں جاری مختلف بیوٹیفیکیشن اور ترقیاتی منصوبوں کا دورہ کیا اور کاموں کی رفتار، معیار اور پیش رفت کا تفصیلی جائزہ لیا۔ اس موقع پر متعلقہ محکموں کے افسران بھی ان کے ہمراہ موجود تھے۔ڈپٹی کمشنر نے پیرس روڈ کا دورہ کرتے ہوئے دیواروں پر بنائے گئے آرٹ ورک اور نقش و نگار، روڈ کے اطراف شجرکاری، لین لائن مارکنگ اور سائن بورڈز کی تنصیب کا معائنہ کیا۔ انہوں نے شہریوں کو خوبصورت، منظم اور محفوظ ماحول کی فراہمی کے لیے روڈ فرنیچر اور کوبلز کی تنصیب کے حوالے سے متعلقہ حکام کو ضروری ہدایات جاری کیں اور جاری کاموں کے معیار اور رفتار کو مزید بہتر بنانے پر زور دیا۔بعدازاں ڈپٹی کمشنر نے اقبال لائبریری پیرس روڈ کا دورہ کیا اور جاری تزئین و آرائش کے منصوبے کا جائزہ لیا۔ انہوں نے ترقیاتی کاموں کی رفتار اور معیار کا معائنہ کرتے ہوئے متعلقہ اداروں کو منصوبہ بروقت اور اعلیٰ معیار کے مطابق مکمل کرنے کی ہدایت کی تاکہ شہریوں کو بہتر تعلیمی اور مطالعاتی سہولیات میسر آسکیں۔