شیخوپورہ ( رپورٹ اسامہ طفیل سے ) شیخوپورہ کے علاقے بدو روڈ اور میاں علی ڈوگراں کے قریب سی سی ڈی پولیس اور اشتہاری مجرمان کے درمیان مبینہ پولیس مقابلے کے دوران ایک ملزم ہلاک جبکہ ایک زخمی حالت میں گرفتار کر لیا گیا، دو ملزمان فرار ہونے میں کامیاب ہو گئے۔پولیس کے مطابق سی سی ڈی کی ٹیم معمول کی گشت کے دوران میاں علی ڈوگراں کے قریب ناکہ بندی کیے ہوئے تھی کہ موٹر سائیکل پر سوار تین مشتبہ افراد نے اچانک پولیس پر فائرنگ کر دی۔ پولیس کی جانب سے جوابی فائرنگ کی گئی جس کے نتیجے میں فائرنگ کا تبادلہ شروع ہو گیا۔فائرنگ رکنے پر ایک ملزم زخمی حالت میں پایا گیا جس کی شناخت امان اللہ، ساکن رحیم یار خان کے نام سے ہوئی، جو بعد ازاں زخموں کی تاب نہ لاتے ہوئے دم توڑ گیا۔دوسری جانب پولیس ذرائع کے مطابق بدو روڈ پر ہاؤسنگ کالونی کے قریب ایک اور کارروائی کے دوران ایک مشتبہ شخص کو زخمی حالت میں حراست میں لیا گیا جس کی شناخت ارسلان عرف “سپرنگ” کے نام سے بتائی جا رہی ہے۔پولیس حکام کا کہنا ہے کہ دونوں واقعات میں ملوث دو ملزمان موقع سے فرار ہو گئے جن کی گرفتاری کے لیے علاقے میں ناکہ بندی کر دی گئی ہے جبکہ مختلف ٹیمیں تشکیل دے کر سرچ آپریشن شروع کر دیا گیا ہےپولیس کے مطابق گرفتار ملزم سے تفتیش جاری ہے جبکہ واقعے کے مختلف پہلوؤں کا جائزہ لیا جا رہا ہے۔
