نواب شاہ (رپورٹ: نفیس آرائیں)
ضلع شہید بینظیرآباد کی تحصیل نواب شاہ کی 6 یونین کونسلز میں 18 مئی بروز پیر سے خصوصی انسدادِ پولیو مہم کا آغاز کیا جا رہا ہے۔ اس سلسلے میں ڈپٹی کمشنر شہید بینظیرآباد عبدالصمد نظامانی کی قیادت میں آگاہی ریلی کا انعقاد کیا گیا، جبکہ بعد ازاں گورنمنٹ نادر شاہ ڈسپنسری میں بچوں کو پولیو سے بچاؤ کے قطرے پلا کر مہم کا باقاعدہ افتتاح بھی کیا گیا۔اس موقع پر ڈپٹی کمشنر عبدالصمد نظامانی نے خطاب کرتے ہوئے کہا کہ نواب شاہ اور اولڈ نواب شاہ کی 6 یونین کونسلز میں ڈرینج ڈسپوزل کے باعث خصوصی انسدادِ پولیو مہم شروع کی جا رہی ہے، لہٰذا والدین کی ذمہ داری ہے کہ وہ اپنے پانچ سال تک کی عمر کے بچوں کو پولیو سے بچاؤ کے قطرے لازمی پلوائیں تاکہ انہیں عمر بھر کی معذوری سے محفوظ بنایا جا سکے۔
محکمہ صحت کے افسران نے بریفنگ دیتے ہوئے بتایا کہ خصوصی انسدادِ پولیو مہم نواب شاہ کی یونین کونسل نمبر 2، 3، 4، 5، 6 اور 7 میں چلائی جائے گی، جہاں مجموعی طور پر 17 ہزار 27 بچوں کو پولیو سے بچاؤ کے قطرے پلائے جائیں گے۔انہوں نے مزید بتایا کہ مہم کی کامیابی کے لیے 69 ٹیمیں تشکیل دی گئی ہیں، جن میں 65 موبائل ٹیمیں، ایک ٹرانزٹ ٹیم اور 3 فکسڈ ٹیمیں شامل ہیں۔
تقریب میں ڈسٹرکٹ ہیلتھ آفیسر ڈاکٹر مدثر حسین، ایڈیشنل ڈسٹرکٹ ہیلتھ آفیسر ڈاکٹر ریاض شاہ سمیت محکمہ صحت کے دیگر افسران اور متعلقہ عملے نے بھی شرکت کی۔