لاہور: ہنڈا اٹلس کارز پاکستان نے اپنے پرانے ماڈلز کی ہزاروں گاڑیوں کے حوالے سے ایک اہم ‘ریکال’ (Recall) الرٹ جاری کیا ہے۔ کمپنی نے ایئربیگ سسٹم میں ممکنہ فنی خرابی کے باعث صارفین کو ہدایت کی ہے کہ وہ فوری طور پر قریبی ڈیلرشپ سے رجوع کریں۔
کمپنی کے مطابق، یہ اقدام انسانی جانوں کے تحفظ اور گاڑیوں کے حفاظتی نظام کو یقینی بنانے کے لیے اٹھایا گیا ہے۔
رپورٹ کے مطابق ہنڈا اٹلس نے درج ذیل ماڈلز اور سالِ تیاری کی حامل گاڑیوں کو واپس طلب کیا ہے:
ہنڈا سیوک اورئیل (Honda Civic Oriel): سال 2006 سے 2012 کے دوران تیار کردہ ماڈلز۔
ہنڈا سی آر وی (Honda CR-V): سال 2008 سے 2011 کے ماڈلز۔
ہنڈا ایکورڈ (Honda Accord): سال 2004 سے 2012 کے درمیان تیار ہونے والی گاڑیاں۔
کمپنی نے واضح کیا ہے کہ ان تمام متاثرہ گاڑیوں کے ایس آر ایس (SRS) ایئربیگ سسٹم کی تبدیلی کا عمل ملک بھر میں موجود ہانڈا کی مجاز 3S اور 2S ڈیلرشپس پر کیا جائے گا۔
ایئربیگز کی تبدیلی کا یہ تمام عمل مکمل طور پر مفت ہوگا اور صارفین سے کوئی چارجز وصول نہیں کیے جائیں گے۔
ہنڈا اٹلس نے اپنے آفیشل سوشل میڈیا پلیٹ فارمز پر جاری بیان میں کہا ہے کہ "کسٹمر سیفٹی” ہماری اولین ترجیح ہے۔ وہ تمام صارفین جن کے پاس مذکورہ بالا ماڈلز کی گاڑیاں موجود ہیں، وہ مزید رہنمائی یا اپائنٹمنٹ کے لیے ہانڈا کی ہیلپ لائن یا قریبی ڈیلرشپ سے رابطہ کریں تاکہ کسی بھی ناخوشگوار واقعے سے بچا جا سکے۔
اس سے قبل بھی عالمی سطح پر ایئربیگز بنانے والی کمپنی کے انفلیٹرز (Inflators) میں مسائل کی وجہ سے ہانڈا سمیت کئی کمپنیوں نے گاڑیاں واپس بلائی تھیں، اور اب پاکستان میں اس عمل کو دوبارہ تیز کر دیا گیا ہے۔