سکھر (رپورٹ/عبد الرحمان راجپوت) شدید گرمی کے موسم میں سکھر شہر کے مختلف علاقوں میں غیر اعلانیہ اور طویل لوڈشیڈنگ نے شہریوں کی زندگی اجیرن بنا دی ہے۔ نیوپنڈ، گھنٹہ گھر، غریب آباد، واریتڑ، ٹکر محلہ، سوکھا تالاب، نیوگوٹھ سمیت متعدد علاقوں کے مکین سخت پریشانی کا شکار ہیں۔ شہریوں کے مطابق ایک گھنٹہ بجلی فراہم کی جاتی ہے جبکہ گھنٹوں بجلی بند رکھی جاتی ہے، جس کے باعث معمولاتِ زندگی بری طرح متاثر ہو رہے ہیں۔عوام کا کہنا ہے کہ شدید گرمی اور حبس میں بجلی کی بار بار بندش سے بچے، بزرگ، خواتین اور بیمار افراد شدید اذیت کا شکار ہیں۔ کاروباری سرگرمیاں متاثر ہو رہی ہیں جبکہ گھروں میں پانی کی قلت بھی پیدا ہو رہی ہے۔ شہریوں نے شکایت کرتے ہوئے کہا کہ ماضی میں خورشید میرانی کے دور میں اس قدر بدترین صورتحال نہیں تھی اور لوڈشیڈنگ نسبتا کم ہوتی تھی۔سکھر کی عوام نے سابق وفاقی وزیر اسلام الدین شیخ، ان کے صاحبزادوں نعمان شیخ، ارسلان شیخ اور خصوصا اصنان شیخ سے امیدیں وابستہ کرتے ہوئے اپیل کی ہے کہ وہ اس سنگین مسئلے کا فوری نوٹس لیں اور متعلقہ اداروں سے رابطہ کر کے شہر میں بجلی کی غیر اعلانیہ لوڈشیڈنگ ختم کروائیں۔
