لاہور پولیس ملکی سالمیت کیلئے افواجِ پاکستان کے شانہ بشانہ کھڑی ہے، بلال صدیق کمیانہ

لاہور( ملک ظہیر کی رپورٹ) معرکہ حق کی تقریبات کے سلسلے میں لاہور بھر میں سکیورٹی کو ہائی الرٹ کر دیا گیا جبکہ سی سی پی او لاہور بلال صدیق کمیانہ نے آپریشن “بنیان المرصوص” کی کامیابی کا ایک سال مکمل ہونے پر قوم اور افواجِ پاکستان کو مبارکباد پیش کی ہے۔ سی سی پی او لاہور کا کہنا تھا کہ وطن عزیز کے دفاع کیلئے جانوں کا نذرانہ پیش کرنے والے شہداء کی قربانیوں کو سلام پیش کرتے ہیں جبکہ غازیوں کی جرات، بہادری اور شجاعت پوری قوم کیلئے باعثِ فخر ہے۔ انہوں نے کہا کہ ملکی بقا، سلامتی اور استحکام کیلئے لاہور پولیس افواجِ پاکستان کے شانہ بشانہ کھڑی ہے۔ بلال صدیق کمیانہ نے معرکہ حق کی تقریبات، ریلیوں اور عوامی اجتماعات کیلئے فول پروف سکیورٹی انتظامات یقینی بنانے کی ہدایت جاری کرتے ہوئے کہا کہ فیلڈ فورس ہر وقت متحرک رہے جبکہ ڈولفن اسکواڈ، پی آر یو اور ایلیٹ فورس شہر بھر میں گشت مزید مؤثر بنائیں۔ انہوں نے کہا کہ تقریبات اور ریلیوں کی نگرانی سیف سٹیز اتھارٹی کے جدید کیمروں کے ذریعے کی جائے گی تاکہ کسی بھی مشکوک سرگرمی پر فوری ردعمل دیا جا سکے۔ سی سی پی او لاہور نے فیلڈ افسران کو ضلعی انتظامیہ اور متعلقہ اداروں کے ساتھ قریبی رابطہ رکھنے کی بھی ہدایت کی۔