گوجرانوالہ کی تاریخ میں پہلی بار ماس ٹرانزٹ سسٹم متعارف کرانے کا فیصلہ، وزیراعلیٰ مریم نواز نے منظوری دیدی

لاہور:وزیراعلیٰ پنجاب مریم نواز نے گوجرانوالہ ماس ٹرانزٹ سسٹم کے ڈیزائن کی باقاعدہ منظوری دے دی ہے۔ اس منصوبے کا مقصد شہر کے شہریوں کو جدید، تیز رفتار اور ماحول دوست سفری سہولیات فراہم کرنا ہے۔ وزیراعلیٰ نے ہدایت کی ہے کہ گوجرانوالہ کے تمام علاقوں کو فیڈر بس سروس کے ذریعے میٹرو ٹرین سے منسلک کیا جائے تاکہ عوام کو مربوط ٹرانسپورٹ سسٹم میسر آ سکے۔
وزیراعلیٰ پنجاب کی زیر صدارت اہم اجلاس میں منصوبے پر تفصیلی بریفنگ دی گئی، جس میں بتایا گیا کہ گوجرانوالہ میں ماس ٹرانزٹ سسٹم کی گنجائش تقریباً 26 لاکھ مسافروں کے روزانہ سفر کے مطابق رکھی گئی ہے۔ منصوبہ گکھڑ سے ایمن آباد تک 31.5 کلومیٹر طویل ہوگا، جس کی تکمیل کے لیے 12 ماہ کی مدت مقرر کی گئی ہے۔
منصوبے کے تحت 24 اسٹیشن قائم کیے جائیں گے جن میں سے 2 اسٹیشن انڈرگراؤنڈ ہوں گے، جبکہ ٹریفک کی روانی کو بہتر بنانے کے لیے 17 سے 19 کلومیٹر سیکشن زیر زمین تعمیر کرنے کی بھی اصولی منظوری دی گئی ہے۔ اسی طرح دو ٹنل سیکشن بنانے کا فیصلہ بھی کیا گیا ہے۔
اجلاس میں بتایا گیا کہ گوجرانوالہ ماس ٹرانزٹ سسٹم کے ہر اسٹیشن اور ڈپو پر سولر سسٹم نصب کیا جائے گا تاکہ توانائی کے اخراجات کم کیے جا سکیں اور منصوبہ ماحول دوست بنایا جا سکے۔ ڈپو گرجاکھ، چن دا قلعہ اور گوندلا والا کے علاقوں میں قائم کیے جائیں گے۔
مزید بتایا گیا کہ منصوبے کے دونوں اطراف 62 کلومیٹر طویل ڈرین بھی تعمیر کی جائے گی، جبکہ ایک جدید کمانڈ اینڈ کنٹرول سنٹر بھی قائم کیا جائے گا جو پورے نظام کی نگرانی کرے گا۔
وزیراعلیٰ پنجاب مریم نواز نے کہا کہ یہ منصوبہ گوجرانوالہ کے شہریوں کے لیے ایک شاندار تحفہ ہوگا اور اس سے شہر کا ٹرانسپورٹ کلچر مکمل طور پر بدل جائے گا۔ انہوں نے ہدایت کی کہ منصوبے پر کام کو تیزی سے مکمل کیا جائے تاکہ شہری جلد از جلد اس سہولت سے فائدہ اٹھا سکیں۔
گوجرانوالہ میں ماس ٹرانزٹ سسٹم کی منظوری کو شہری ترقی کے حوالے سے ایک اہم پیش رفت قرار دیا جا رہا ہے، جس سے نہ صرف ٹریفک کے مسائل میں کمی آئے گی بلکہ سفری نظام بھی جدید خطوط پر استوار ہوگا۔