دبئی:دبئی میں کھیلے گئے انٹرنیشنل باکسنگ ایونٹ "فائٹ سٹی” میں پاکستان کے ابھرتے ہوئے باکسر عبداللہ شکیل چانڈیو نے اپنی برق رفتار کارکردگی سے سب کو حیران کر دیا۔
عبداللہ نے بھارتی حریف نیرج سینی کے خلاف پہلے ہی راؤنڈ کے محض 35 سیکنڈز میں تکنیکی بنیاد پر فتح حاصل کر کے پاکستان کا نام روشن کر دیا۔
View this post on Instagram
بیٹل باکسنگ پروموشنز کے زیرِ اہتمام منعقدہ اس ایونٹ میں دنیا بھر سے نامور باکسرز نے شرکت کی۔ "نائٹ آف چیمپئنز” اور "فائٹ سٹی” جیسے دو بڑے ایونٹس کے دوران ورلڈ باکسنگ ایسوسی ایشن (WBA) اور یونیورسل باکسنگ آرگنائزیشن (UBO) کے متعدد ٹائٹل مقابلے ہوئے، جن کی نگرانی مڈل ایسٹ پروفیشنل باکسنگ کمیشن کے ہوزے موہن نے کی۔
ایونٹ میں بین الاقوامی معیار کے مطابق 6 بڑے ٹائٹلز کا فیصلہ ہوا، لیکن شائقین کی توجہ کا مرکز پاک-بھارت ٹاکرا رہا۔ عبداللہ شکیل چانڈیو نے مقابلے کے آغاز میں ہی بھارتی باکسر پر تابڑ توڑ حملے کیے اور انہیں سنبھلنے کا موقع دیے بغیر ریکارڈ وقت میں ناک آؤٹ کر کے شاندار کامیابی سمیٹی۔