تہران: ایران نے اسرائیل اور امریکا کے ساتھ جاری کشیدگی کے درمیان خلیجی ممالک، خصوصاً بحرین اور متحدہ عرب امارات کے ہوٹل مالکان کو سخت وارننگ جاری کرتے ہوئے کہا ہے کہ اگر انہوں نے امریکی فوجی اہلکاروں کو قیام کی سہولت فراہم کی تو ایسی عمارتوں کو جائز فوجی ہدف تصور کیا جا سکتا ہے۔
ایران کے وزیرِ خارجہ عباس عراقچی نے خلیج فارس کے ممالک میں ہوٹلز کو خبردار کیا ہے کہ وہ امریکی فوجی اہلکاروں کی میزبانی سے گریز کریں ورنہ ان کے مہمانوں کی جان کو خطرہ ہو گا۔عباس عراقچی نے جمعرات کو ایکس پر انگریزی زبان میں جاری کیے گئے اپنے بیان میں کہا کہ امریکی ہوٹل فوجی اہلکاروں کو رہائشی خدمات فراہم نہیں کرتے، لہذا خلیجی ممالک کے ہوٹلوں کو بھی اسی طریقہ کار پر عمل کرنا چاہیے۔
دوسری جانب، خبر رساں ایجنسی شنہوا کے حوالے سے بتایا گیا ہے کہ ایران کی یہ وارننگ صرف مخصوص ہوٹلوں تک محدود نہیں بلکہ ان تمام مقامات پر لاگو ہوتی ہے جہاں غیر ملکی فوجی اہلکاروں کو رہائش یا سہولت فراہم کی جا رہی ہے۔ ایران نے واضح کیا ہے کہ اگر یہ عمل جاری رہا تو اس کے نتائج فوری اور سنگین ہو سکتے ہیں۔
