کیلے فورنیا: ’ایپل‘ کے آنے والے فلیگ شپ فونز کے حوالے سے ایک نئی افواہ سامنے آئی ہے، جس کے مطابق ’آئی فون 18 پرو‘ اور پرو میکس ماڈلز کو ایک منفرد ڈارک چیری ریڈ رنگ میں متعارف کرایا جا سکتا ہے۔
سی نیٹ کے مطابق یہ رنگ روایتی سرخ کے بجائے زیادہ گہرے، وائن جیسے شیڈ پر مبنی ہوگا، جو اسے ایک پریمیم اور منفرد لک دے سکتا ہے۔
یہ دعویٰ ایک نامعلوم ذریعے کے حوالے سے سامنے آیا ہے، جس کا تعلق سپلائی چین سے بتایا جا رہا ہے۔ نئے آئی فون ماڈلز کے ساتھ ساتھ ایپل کا پہلا فولڈیبل فون بھی رواں سال ستمبر میں لانچ کیا جا سکتا ہے۔ تاہم فولڈیبل ڈیوائس کے نام کے حوالے سے مختلف قیاس آرائیاں جاری ہیں، جن میں الٹرا، فولڈ یا آئی فلپ جیسے نام شامل ہیں۔
اردو نیوز کے مطابق اب تک ’آئی فون 18 پرو میکس‘ یا فولڈیبل فون کے بارے میں ایپل کی جانب سے کوئی باضابطہ اعلان نہیں کیا گیا اور تمام معلومات افواہوں اور لیکس پر مبنی ہیں۔
مزید اطلاعات کے مطابق کمپنی دیگر رنگوں پر بھی غور کر رہی ہے، جن میں ہلکا نیلا، گہرا سرمئی اور سلور شامل ہیں۔ دلچسپ بات یہ ہے کہ اس بار مکمل سیاہ رنگ شامل نہ ہونے کا امکان ظاہر کیا جا رہا ہے، جو ماضی کی افواہوں کے برعکس ہے۔
دوسری جانب فولڈیبل فون کے لیے محدود رنگوں کے آپشنز متوقع ہیں، جن میں سلور وائٹ اور گہرے نیلے (انڈیگو) جیسے رنگ زیرِ غور ہیں۔واضح رہے کہ ایپل ہر سال اپنے فلیگ شپ فونز کے رنگوں میں تبدیلی کرتا رہتا ہے۔ گزشتہ سال ’آئی فون 17 پرو‘ کے لیے ’کاسمک اورینج‘ رنگ متعارف کرایا گیا تھا جو صارفین میں خاصا مقبول ہوا۔
