راجن پور:وزیراعلیٰ پنجاب مریم نواز کا کہنا ہے کہ جعلی حکومت وہ ہوتی ہے جو بے حس ہوتی ہے وہ جو لوگوں کا حق، ترقی، سکون اور امن کھا جاتی ہے۔ خیبر پختونخوا حکومت نے ستھرا پنجاب کا ماڈل طلب کیا تھا جو انہیں دیدیا۔
راجن پور میں گرین بس سروس کی افتتاحی تقریب سے خطاب میں انہوں نے کہا ک نقشے میں راجن پور کو آخری ضلع سمجھا جاتا ہے، مگر میرے دل کے نقشے میں پنجاب کی شروعات یہیں سے ہوتی ہے۔ راجن پور لاہور سے دور سہی، مگر نواز شریف اور مریم نواز کے دل سے دور نہیں۔ پنجاب کا کوئی چپہ ایسا نہیں جہاں ترقیاتی کام نہ ہو رہا ہو اور خیبرپختونخواہ کے لوگ وزیراعلیٰ سے سوال کر رہے ہیں، کے پی حکومت نے ہم سے ستھرا پنجاب کا ماڈل مانگا جو ہم نے دے دیا ہے، میں بھی یہی ماڈل پیش کرنے کے لیے برازیل گئی تھی سیر کرنے نہیں، تم اگر دنیا کے کسی ملک میں جاؤ تو کیا کہو گے لوگوں کو شعور دیا؟ کیا شعور سے کسی کا پیٹ بھرتا ہے، میرے بچو! یاد رکھنا جعلی حکومت وہ ہوتی ہے جو لوگوں کا حق چھین لیتی ہے، جعلی حکومت وہ ہوتی ہے جو لوگوں کی ترقی چھین لیتی ہے، جعلی حکومت وہ ہوتی ہے جو لوگوں کا سکون چھین لیتی ہے، جعلی حکومت وہ ہوتی ہے جو لوگوں کا امن اور خوشی چھین لیتی ہے، جب تک عوام حکمرانوں سے سوال نہیں کریں گے حکومتیں سوئی رہیں گی۔
مریم نواز کا کہنا ہے کہ جب لوگ پنجاب کا نقشہ دیکھتے ہیں تو راجن پور کو آخری ضلع سمجھتے ہیں مگر میرے دل کے نقشے میں پنجاب کی شروعات راجن پور سے ہوتی ہے، راجن پور لاہور سے دور ضرور ہے مگر نواز شریف اور مریم نواز کے دل سے دور نہیں، یہاں کے بلوچ بھائیوں کی پگڑی، بلوچی ٹوپی اور بلوچی چادر قابل احترام ہیں، میں راجن پور آئی تو مجھے ہیلی کاپٹر سے آنے کا کہا گیا مگر میں نے کہا کہ میں گاڑی سے آؤں گی۔
وزیراعلیٰ پنجاب نے کہا کہ یہ الزام لگایا جاتا ہے ترقی کے کام صرف لاہور اور وسطی پنجاب تک محدود رہتے ہیں مگر آج حقیقت سب کے سامنے ہے، میں اس وقت راجن پور میں کھڑی ہوں جو جنوبی پنجاب کا حصہ ہے، یہ علاقہ برسوں سے پسماندہ رہا مگر اب یہاں بھی جدید سہولیات آ رہی ہیں، وہی جدید اور ماحول دوست بسیں جو لاہور میں چل رہی ہیں، آج سے راجن پور میں بھی چلیں گی، یہ عملی ثبوت ہے کہ ترقی پورے پنجاب میں پہنچ رہی ہے، اور وہ جو جنوبی پنجاب کے بارے میں ہر وقت سیاسی نعرے لگاتے تھے کہ جنوبی پنجاب کو کچھ نہیں ملا اور اس کے نام پہ ووٹ لیتے تھے وہ جھوٹ آج گرین بس نے اپنے پہیوں کے نیچے دفن کردیا۔