فیلڈ مارشل سید عاصم منیر سے لیبیا کی مسلح افواج کے سربراہ کی ملاقات،پیشہ ورانہ تعاون پر گفتگو

راولپنڈی: چیف آف آرمی اسٹاف اور چیف آف ڈیفنس فورسز،فیلڈ مارشل سید عاصم منیرسے لیبیا کی عرب مسلح افواج کے کمانڈر اِن چیف فیلڈ مارشل خلیفہ ابو القاسم حفتر نے اپنے نائب لیفٹیننٹ جنرل صدام خلیفہ حفتر کے ہمراہ آج جنرل ہیڈکوارٹرز میں ملاقات کی۔
آئی ایس پی آر کے مطابق ملاقات کے دوران باہمی دلچسپی کے امور پر تبادلہ خیال کیا گیا، خاص طور پر متعلقہ خطوں کی سکیورٹی صورتحال اور پیشہ ورانہ تعاون پر گفتگو ہوئی۔ دونوں جانب سے پاکستان اور لیبیا کی مسلح افواج کے درمیان مسلسل روابط اور تعاون کی اہمیت پر زور دیا گیا۔
فیلڈ مارشل سید عاصم منیر نے معزز مہمانوں کا خیرمقدم کرتے ہوئے لیبیا کے ساتھ دوطرفہ تعلقات کو مزید مضبوط بنانے کے عزم کا اعادہ کیا اور لیبیا میں امن، استحکام اور ادارہ جاتی ترقی کے لیے پاکستان کی حمایت کا اظہار کیا۔
آئی ایس پی آر کے مطابق ملاقات خوشگوار اور تعمیری ماحول میں ہوئی جو پاکستان اور لیبیا کے درمیان دیرینہ دوستانہ تعلقات کی عکاس ہے۔
اس سے قبل نور خان ایئربیس آمد کے موقع پر فیلڈ مارشل خلیفہ ابو القاسم حفتر کا استقبال فیلڈ مارشل سید عاصم منیر نے کیا۔ معزز مہمان نے جی ایچ کیو میں شہداء کی یادگار پر حاضری دی اور پھولوں کی چادر چڑھائی۔