طالبات کی خود انحصاری کے لیے گرلز ہائی سکول نوتانی وانگ میں سکل سینٹر قائم

لسبیلہ: بلوچستان کے ضلع لسبیلہ کے علاقے نوتانی وانگ میں محکمہ تعلیم بلوچستان اور یونیسیف کے تعاون سے گرلز ہائی سکول میں سکل سینٹر قائم کر دیا گیا ہے، جو طالبات کو تعلیم کے ساتھ ساتھ عملی ہنر سکھا کر خودمختار بنانے کا ذریعہ بن رہا ہے۔ اس سکل سینٹر میں اس وقت 90 طالبات زیرِ تربیت ہیں جو سلائی کڑھائی اور دیگر فنی مہارتیں سیکھ رہی ہیں۔
انسٹرکٹر کے مطابق چھ سے سات ماہ کے دوران طالبات نے کئی ہنر سیکھ لیے ہیں اور اب عملی کام کی جانب بڑھ رہی ہیں۔یونیسیف کی جانب سے فراہم کیے گئے سولر سسٹم اور جدید سلائی کڑھائی مشینوں نے اس سینٹر کو نمایاں حیثیت دی ہے، جہاں طالبات بلوچ کڑھائی اور فیشن ڈیزائننگ سے متعلق مختلف مصنوعات تیار کر رہی ہیں۔
سکل سینٹر میں ساتویں، آٹھویں اور نویں جماعت کی طالبات شامل ہیں، جنہیں خصوصی ڈیزائننگ کورس اور درسی مواد فراہم کیا گیا ہے۔ اس منصوبے کے ذریعے طالبات میں خودانحصاری، خوداعتمادی اور فنی مہارتوں کو فروغ دیا جا رہا ہے، جبکہ مقامی سطح پر اسے تعلیم اور ترقی کی سمت ایک مثبت پیش رفت قرار دیا جا رہا ہے۔