اسلام آباد :وزیراعظم شہباز شریف نے کہا ہے کہ افواج پاکستان اور ان کی قربانیوں کے خلاف سوشل میڈیا پر ہونے والے زہریلے پروپیگنڈا کی مکمل بیخ کنی کرنا ہو گی۔ ملک میں موسمیاتی اور زرعی ایمرجنسی لگانے کا اعلان۔
وزیر اعظم شہباز شریف نے ملک میں موسمیاتی اور زرعی ایمرجنسی لگانے کا اعلان کردیا۔ وفاقی کابینہ نے ملک میں زرعی اور موسمیاتی ایمرجنسی نافذ کرنے کی منظوری دے دی۔اجلاس سے خطاب کرتے ہوئے انہوں نے کہا کہ سیلاب نے گلگت، بلتستان، آزاد کشمیر، خیبرپختونخوا اور پنجاب میں تباہی مچادی، اور اب سندھ کی وادیوں میں پانی داخل ہو رہا ہے۔
ان کا کہنا تھا کہ میں نے وزارت موسمیاتی تبدیلی کے سیکرٹری کی ذمے داری لگائی ہے کہ آپ ایک پروگرام تیار کریں، ہم راتو ں رات موسماتی تبدیلیوں سے نہیں نمٹ سکتے، بہت بڑے چیلنجز ہیں، اس میں اکیلا پاکستان کچھ بھی نہیں کر سکتا، سب کو مل کر کرنا ہوگا، لیکن انہیں ایک روڈ میپ پیش کرنا چاہیے۔
بدھ کو وزیراعظم شہباز شریف نے کابینہ کے اجلاس سے خطاب میں کہا کہ جس طرح سے افواج پاکستان کی قربانیوں کی سوشل میڈیا پر تضحیک کی جا رہی ہے، اس کی جتنی مذمت کی جائے ناکافی ہے۔فوج کے جذبے اور قربانیوں کی وجہ سے ہی فتنہ الخوارج کے خلاف کامیابیاں حاصل کر رہے ہیں
وزیراعظم کا کہنا تھا کہ خود سے اور ملک و قوم کے ساتھ اس سے بڑی ظلم و زیادتی نہیں ہو گی کہ اس فتنے کی غیرمتزلزل عزم کے ساتھ بیخ کنی نہ کی گئی۔
انہوں نے مزید کہا کہ یہ ہمارا اولین سیاسی و قومی فرض ہے کہ سوشل میڈیا کے ذریعے فتنہ پھیلانے والوں کی مکمل بیخ کنی کریں اور ان کی شناخت کریں چاہے وہ پاکستان میں بیٹھ کر رہے ہوں یا پھر بیرون ملک سے۔
وزیراعظم شہباز شریف نے کہا کہ ’جس طرح سے پاکستان کی فوج اور اس کی قیادت کو مطعون کیا جا رہا ہے، یہ ناقابل برداشت ہے بلکہ آخری حد تک جا کر اس سرے کا پتا لگانا ہوگا اور اس کا سر کچلنا ہوگا۔
وزیراعظم نے کہا کہ سیلاب سے زراعت میں جو نقصان ہوا ہے، اس کی تفصیل آئندہ ہفتے سامنے آجائے گی، نقصانات کا جائزہ لیا جا رہا ہے، اس کو کابینہ میں لایا جائے گا، لیکن میں سمجھتا ہوں کہ کوئی ایک ہزار کے لگ بھگ پاکستانی سیلاب کی نذر ہوچکے ہیں، اللہ کو پیارے ہوگئے، ہزاروں زخمی ہوگئے، ہزاروں ایکڑ زمین پنجاب میں زیر آب ہے، اب سیلاب سندھ میں جا رہا ہے۔
شہباز شریف نے کہا کہ سیلاب سے جو تباہ کاری اور نقصانات ہوئے، اس حوالے سے آج کابینہ میں مشاورت کے بعد کلائمٹ ایمرجنسی اور زرعی ایمرجنسی کا اعلان کر رہا ہوں اور اس کے ساتھ ہی احسن اقبال کی سربراہی میں ایک کمیٹی تشکیل دے رہے ہیں تا کہ اس پر فی الفور کام شروع کیا جا سکے۔
ان کا کہنا تھا کہ اس اعلان کے بعد ایپکس لیول پر اجلاس بلا رہے ہیں جس میں عرق ریزی کے ساتھ گفتگو کرکے ایک پالیسی بنائیں گے۔
وفاقی کابینہ کے اجلاس سے خطاب کرتے ہوئے وزیراعظم شہباز شریف کا کہنا تھا میجر عدنان اسلم نے خوارج سے لڑتے ہوئے جان کی قربانی دی، میجر عدنان اسلم کے والد نے کہا کہ بیٹے کی شہادت پر فخر ہے، شہید کی بہنوں نے کہا کہ ہم بہت دلیر بھائی کی بہنیں ہیں، ہم بھی اس راہ میں قربانی دیں گے۔۔