لاس اینجلس:دنیا بھر میں اپنی منفرد گلوکاری اور انداز سے دھوم مچانے والی معروف امریکی پاپ اسٹار لیڈی گاگا (Lady Gaga) نے مداحوں کو حیرت زدہ کرتے ہوئے اپنے پہلے بچے کی پیدائش کی خبر چھپا کر رکھی، اور اب وہ ایک راز کی طرح اس ننھے مہمان کی دنیا میں آمد کے بعد باضابطہ طور پر ‘ماں’ بن چکی ہیں۔
میڈیا رپورٹس اور وائرل ہونے والی تصاویر کے مطابق، لیڈی گاگا کو حال ہی میں شمالی کیلیفورنیا میں اپنے منگیتر کے ہمراہ چہل قدمی کرتے ہوئے دیکھا گیا، جہاں وہ اپنے اس خفیہ بچے کو گود میں اٹھائے ہوئے نظر آئیں۔ اس خوشگوار انکشاف کے بعد گلوکارہ کے مداحوں میں خوشی کی لہر دوڑ گئی ہے اور سوشل میڈیا پر تبصروں کا تانتا بندھ گیا ہے۔
تاہم، لیڈی گاگا کے ترجمانوں اور منیجمنٹ کی جانب سے اب تک بچے کی پیدائش، جنس یا نام کے حوالے سے کوئی باضابطہ بیان جاری نہیں کیا گیا اور وہ اس معاملے پر مکمل خاموشی اختیار کیے ہوئے ہیں۔ اس کے باوجود، سوشل میڈیا صارفین اور ان کے ‘لٹل مانسٹرز’ کہلانے والے مداحوں نے دنیا کی اس مقبول ترین گلوکارہ کو ماں بننے پر مبارکبادیں دینا شروع کر دی ہیں۔