جھڈو (رپورٹ: قیصر راجہ راجپوت)
برطانوی حکومت سے پنشن حاصل کرنے والی برصغیر پاک و ہند کی منفرد اعزاز کی حامل معمر ترین بیوہ خاتون جنت بی بی زوجہ عبدالشکور قائم خانی 108 برس کی عمر میں جھڈو میں انتقال کر گئیں۔ ان کی وفات کی خبر سنتے ہی علاقے بھر میں سوگ کی فضا چھا گئی۔
تفصیلات کے مطابق مرحومہ جنت بی بی 1919ء میں بھارتی ریاست راجستھان کے ضلع جھنجھنو میں پیدا ہوئیں۔ ان کے شوہر عبدالشکور قائم خانی برطانوی فوج کی معروف 17 پونا ہارس رجمنٹ میں بطور سپاہی خدمات انجام دے چکے تھے۔ شوہر کی وفات کے بعد برطانوی حکومت کی جانب سے جنت بی بی کے لیے بیوہ پنشن مقرر کی گئی، جو وہ اپنی زندگی کے آخری ایام تک باقاعدگی سے وصول کرتی رہیں۔
جنت بی بی کو یہ منفرد اعزاز حاصل تھا کہ وہ برصغیر پاک و ہند کی واحد خاتون تھیں جو برطانوی فوج کے ایک سپاہی کی بیوہ ہونے کی حیثیت سے تا حیات برطانوی حکومت سے پنشن حاصل کر رہی تھیں۔
مرحومہ جھڈو کے سابق وائس چیئرمین حاجی عمردراز قائم خانی کی والدہ تھیں۔ ان کے انتقال پر عزیز و اقارب، رشتہ داروں سمیت علاقے کی سیاسی و سماجی شخصیات نے گہرے دکھ اور افسوس کا اظہار کرتے ہوئے مرحومہ کے درجات کی بلندی اور لواحقین کے لیے صبرِ جمیل کی دعا کی ہے۔


