بلوچستان (رحمت اللہ بلوچ، بیورو چیف بے نقاب نیوز)
سبی پولیس نے سندھ پولیس کے تعاون سے اہم کارروائی کرتے ہوئے پسند کی شادی کے معاملے پر گھر سے جانے والی ہندو برادری کی لڑکی بندیا کماری عرف یاسمین بی بی کو سندھ کے علاقے بخشاپور سے تحویل میں لے لیا، جنہیں عدالت میں پیشی کے بعد دارالامان سکھر منتقل کر دیا گیا ہے۔ سبی سے تعلق رکھنے والی بندیا کماری عرف یاسمین بی بی پسند کی شادی کی غرض سے ایک ڈومکی نوجوان کے ہمراہ سندھ کے علاقے بخشاپور چلی گئی تھیں۔ معاملے کی سنگینی کے پیش نظر ڈی آئی جی سبی پرویز احمد عمرانی اور ایس ایس پی سبی عبدالحمید کے خصوصی احکامات پر ایس ایچ او سٹی سبی عبدالرؤف مرغزانی نے بخشاپور پولیس کے ہمراہ مشترکہ کارروائی کی۔
کارروائی کے دوران متعلقہ خاتون کو بحفاظت تحویل میں لے کر مقامی عدالت میں پیش کیا گیا، جہاں عدالتی احکامات کی روشنی میں انہیں دارالامان سکھر منتقل کر دیا گیا۔
سندھ کی حدود میں جا کر خاتون کو تحویل میں لینے اور بروقت عدالت میں پیش کرنے کے اس اقدام میں سبی پولیس اور بخشاپور پولیس کے باہمی تعاون کو انتہائی اہم قرار دیا جا رہا ہے۔



