برلن:
جرمن فوج (Bundeswehr) نے اہم عسکری تنصیبات، حساس معلومات اور ڈیٹا سکیورٹی کے تحفظ کو یقینی بنانے کے لیے چینی ساختہ ڈرونز کا استعمال مکمل طور پر بند کرنے کا اعلان کر دیا ہے۔ وزارت دفاع کے مطابق یہ فیصلہ تکنیکی خود مختاری کو مضبوط کرنے اور ممکنہ جاسوسی یا سائبر خطرات سے بچنے کے لیے کیا گیا ہے۔
رپورٹس کے مطابق جرمن فوجی حکام نے تربیتی مقاصد اور اہداف کے لیے استعمال ہونے والے ان کمرشل ڈرونز کو مرحلہ وار ہٹا کر ان کی جگہ یورپی اور ملکی متبادل آلات استعمال کرنے کا فیصلہ کیا ہے۔ ملٹری کاؤنٹر انٹیلی جنس سروس (MAD) کی جانب سے اس خدشے کا اظہار کیا گیا تھا کہ ان ڈرونز میں موجود سقم اور ڈیٹا لیک (Data Exfiltration) کے خطرات عسکری رازوں کی ترسیل کا سبب بن سکتے ہیں۔
واضح رہے کہ اس فیصلے کے علاوہ جرمن فوج نے سکیورٹی زونز اور فوجی بیرکوں میں بعض چینی ساختہ گاڑیوں کے داخلے پر بھی پابندی عائد کر دی ہے تاکہ حساس مقامات پر کیمروں اور سنسرز کے ذریعے ممکنہ نگرانی کے خطرات کو روکا جا سکے۔