ضمنی انتخابات میں شاندار فتح عوام کا مریم نواز پر اعتماد ہے: عظمیٰ بخاری، کالعدم جماعتوں کی سیاسی سرگرمیوں پر الیکشن کمیشن سے نوٹس کا مطالبہ

لاہور: وزیر اطلاعات پنجاب عظمیٰ بخاری نے ساہیوال (چیچہ وطنی) اور گوجرانوالہ کے ضمنی انتخابات میں مسلم لیگ (ن) کی شاندار اور نمایاں اکثریت سے کامیابی پر پارٹی امیدواران راشد بشیر ورک اور اسد حنیف جٹ کو دلی مبارکباد پیش کی ہے۔
اپنے ایک بیان میں وزیر اطلاعات پنجاب عظمیٰ بخاری نے کہا کہ پنجاب کے عوام نے ایک مرتبہ پھر وزیراعلیٰ مریم نواز کی بہترین کارکردگی پر کامل اطمینان کا اظہار کیا ہے۔ انہوں نے کہا کہ مریم نواز کی بے لوث عوامی خدمت کی بدولت مسلم لیگ (ن) ووٹرز کی اولین اور پہلی ترجیح جماعت بن چکی ہے، جس کا ثبوت دونوں امیدواروں کی بڑی اور واضح لیڈ سے فتح ہے۔
عظمیٰ بخاری کا کہنا تھا کہ اس الیکشن میں مسلم لیگ (ن) کے مقابلے میں ‘ون بمقابلہ آل’ کی صورتحال تھی اور ن لیگ کا مقابلہ نامعلوم اور کالعدم تنظیموں کے اتحاد سے تھا۔ انہوں نے الزام عائد کیا کہ پاکستان تحریک انصاف نے ریاست کی جانب سے کالعدم ڈکلیئر کی گئی جماعتوں کے ساتھ مل کر ن لیگ کے خلاف الیکشن لڑا۔
وزیر اطلاعات نے تشویش کا اظہار کرتے ہوئے کہا کہ جو جماعتیں ریاست کی نظر میں کالعدم ہیں، وہ نام بدل کر کھلے عام سیاسی سرگرمیاں کر رہی ہیں، جو کہ ریاست کے لیے ایک بہت بڑا امتحان ہے۔ انہوں نے سوال اٹھایا کہ "دہشت گردوں کی حمایت یافتہ جماعتیں کھلے عام سیاسی سرگرمیاں کیسے کر سکتی ہیں؟”
انہوں نے الیکشن کمیشن آف پاکستان سے فوری نوٹس لینے کا مطالبہ کرتے ہوئے کہا کہ گزشتہ روز پولنگ کے دوران انہوں نے اسی جماعت کے کارندوں کی زبردستی جعلی ووٹ ڈالنے کی ویڈیوز بھی شیئر کی تھیں۔ یہ کارندے الیکشن کمیشن کے عملے کے سامنے دھاندلی کر رہے تھے جو ان کے بااثر ہونے کا ثبوت ہے۔
عظمیٰ بخاری نے کہا کہ تمام تر اتحاد اور ہتھکنڈوں کے باوجود عوام نے ان کالعدم جماعتوں اور ان کے تشدد و دہشت گردی کے بیانیے کو مکمل طور پر مسترد کر دیا ہے۔ کل گوجرانوالہ اور چیچہ وطنی کے عوام نے خدمت، ترقی اور بہترین پرفارمنس کے بیانیے کو فتح یاب کیا ہے۔