پاکپتن(رپورٹ:اکرام حسین شاہ )
انسانیت کو جھنجھوڑ دینے والا ایک افسوسناک اور پر اسرار واقعہ سامنے آیا ہے، جہاں پرانی سبزی منڈی اور لیڈیز پارک کے عین سامنے مبینہ طور پر ایک بغیر نمبر پلیٹ کیری ڈبہ گاڑی دو کمسن بچوں کو بوری میں بند کرکے پھینک کر فرار ہوگئی۔ بوری سے برآمد ہونے والے دونوں بچوں کے پاؤں شاپر بیگز سے بندھے ہوئے تھے، جبکہ دونوں بچے بے ہوشی کی حالت میں پائے گئے۔ اس واقعے نے نہ صرف شہریوں کو شدید خوف و ہراس میں مبتلا کر دیا ہے بلکہ پولیس اور متعلقہ اداروں کی کارکردگی پر بھی کئی سنگین سوالات کھڑے کر دیے ہیں۔شام کے وقت پرانی سبزی منڈی، لیڈیز پارک پاکپتن کے سامنے ایک مشکوک کیری ڈبہ گاڑی مبینہ طور پر بوری پھینک کر موقع سے فرار ہوگئی۔ اہل علاقہ نے جب بوری کھولی تو اندر سے دو کمسن معصوم بچے برآمد ہوئے، جن کے پاؤں شاپر بیگز سے بندھے ہوئے تھے۔ واقعے کی اطلاع فوری طور پر مقامی پولیس اور ریسکیو 1122 کو دی گئی، جس پر ریسکیو اہلکاروں نے دونوں بے ہوش بچوں کو فوری طور پر ڈی ایچ کیو اسپتال پاکپتن منتقل کر دیا۔ریسکیو ذرائع کے مطابق دونوں بچوں کی عمریں تقریباً 7 سال ہیں اور ان کا تعلق عارف والا سے بتایا جاتا ہے۔اس لرزہ خیز واقعے کے بعد شہریوں کی طرف سے مندرجہ ذیل اہم سوالات اٹھائے جا رہے ہیں:اگر یہ بچے مبینہ طور پر عارف والا سے پاکپتن لائے گئے تو راستے میں کسی چیکنگ پوائنٹ پر مشکوک گاڑی کو روکنے کی نوبت کیوں نہ آئی؟شہر کے داخلی راستوں، ہائی وے پٹرولنگ اور شہر کے اندر گشت کرنے والی پولیس کی موجودگی کے باوجود یہ گاڑی شہر کے عین وسط تک کیسے پہنچ گئی؟کیا ہائی وے پٹرولنگ پولیس اور مقامی پولیس نے اپنی ذمہ داریاں پوری کیں؟کیا شہر میں مشکوک گاڑیوں کی نقل و حرکت کی نگرانی کا کوئی مؤثر نظام موجود نہیں ہے؟ شہریوں نے ڈی پی او پاکپتن سے پرزور مطالبہ کیا ہے کہ واقعے کی فوری، شفاف اور غیر جانبدارانہ تحقیقات کروائی جائیں۔ سی سی ٹی وی کیمروں کی مدد سے بغیر نمبر پلیٹ کیری ڈبہ گاڑی اور اس کے ڈرائیور کا سراغ لگایا جائے، بچوں کی شناخت اور ان کے عارف والا سے پاکپتن پہنچنے کے تمام پہلوؤں کا احاطہ کیا جائے، اور اگر کسی ادارے کی غفلت یا لاپرواہی ثابت ہو تو ذمہ داروں کے خلاف سخت قانونی کارروائی عمل میں لائی جائے۔دو معصوم بچوں کا اس حالت میں شہر کے وسط سے ملنا محض ایک واقعہ نہیں بلکہ پورے نظامِ تحفظ پر ایک بڑا سوالیہ نشان ہے۔ آخر ان بچوں کے ساتھ کیا ہوا؟ انہیں کون لایا؟ کیوں لایا؟ اور انہیں بے یار و مددگار حالت میں پھینک کر فرار ہونے والے عناصر کب قانون کی گرفت میں آئیں گے؟ عوام اس کا فوری جواب چاہتی ہے۔