اداکارہ میرا کی چھوٹی بہن شائستہ عباس لندن میں انتقال کر گئیں؛ ویزا نہ ملنے پر اداکارہ آخری دیدار سے محروم

لندن / نیویارک: پاکستان فلم انڈسٹری کی معروف اداکارہ میرا کی چھوٹی بہن اور لنڈن میں مقیم پیشے سے وکیل شائستہ عباس طویل عرصے تک کینسر کے عارضے میں مبتلا رہنے کے بعد انتقال کر گئی ہیں۔
نیویارک سے میڈیا سے گفتگو کرتے ہوئے اداکارہ میرا نے اپنی بہن کے انتقال کی تصدیق کی اور بتایا کہ شائستہ گزشتہ کئی برسوں سے کینسر کے خلاف جنگ لڑ رہی تھیں اور لنڈن کے ایک ہسپتال میں زیرِ علاج تھیں۔
اداکارہ نے انتہائی دکھی لہجے میں گہرے رنج و غم کا اظہار کرتے ہوئے بتایا کہ ان کی بہن کی حالت انتہائی تشویشناک تھی، جس پر انہوں نے برطانوی حکام اور برٹش ہائی کمیشن سے انسانی بنیادوں پر ویزا جاری کرنے کی متعدد اپیلیں کی تھیں، تاکہ وہ اپنی بیمار بہن کی عیادت کر سکیں۔ تاہم، بار بار کی التجا کے باوجود برطانوی حکام نے انہیں ویزا جاری نہیں کیا، جس کے باعث وہ اپنی بہن کا آخری دیدار بھی نہ کر سکیں۔
اداکارہ میرا نے اپنی بہن سے محرومی اور آخری وقت میں ان کے پاس نہ پہنچ پانے پر شدید افسوس اور دل گرفتگی کا اظہار کیا ہے۔