سرگودھا (راجہ نورالہی عاطف کی رپورٹ)
سرگودھا میں عوام کی دیرینہ مشکلات کے خاتمے اور بنیادی ڈھیکانچے کی بہتری کے لیے ترقیاتی کاموں کا باقاعدہ آغاز کر دیا گیا ہے۔ اسی سلسلے میں آرا مارکیٹ اور پرانی سبزی منڈی سرگودھا کی سڑک کی تعمیر کا افتتاح کردیا گیا ہے۔ افتتاحی تقریب میں رکن قومی اسمبلی ارم حامد حمید نے فیتہ کاٹ کر اس اہم منصوبے کا باقاعدہ افتتاح کیا۔
تفصیلات کے مطابق پرانی سبزی منڈی اور آرا مارکیٹ سڑک کی تعمیر کی خوشی میں ایک پروقار تقریب کا انعقاد کیا گیا، جس میں سابق وزیر مملکت چوہدری حامد حمید، حاجی محمد عارف، حاجی محمد تنویر، شیخ آصف اقبال، ملک محمد تاج، مرزا احمد نعمان اکبر اور لیگی کارکنوں سمیت معزز شہریوں کی کثیر تعداد نے شرکت کی۔
افتتاح کے دوران لیگی کارکنوں کا جوش و خروش دیدنی تھا؛ کارکنوں نے ڈھول کی تھاپ پر بھنگڑے ڈالے اور سڑک کی تعمیر پر حکومت اور قیادت کا بھرپور شکریہ ادا کیا۔
اس موقع پر تقریب سے خطاب کرتے ہوئے خاتون رکن قومی اسمبلی ارم حامد حمید کا کہنا تھا کہ ہمارا گھرانا گزشتہ 50 سال سے پاکستان مسلم لیگ (ن) کے ساتھ جڑا ہوا ہے، اور ہم نے ہمیشہ پارٹی قیادت کے ویژن پر من و عن عمل کرتے ہوئے اس کا ساتھ نبھایا ہے۔ قیادت نے اسی وفاداری اور خدمت کے اعتراف پر مجھے سپیشل سیٹ پر منتخب کیا، اور آج ہم عوام کی دہلیز پر خدمت کا یہ فریضہ احسن طریقے سے سر انجام دے رہے ہیں۔
انہوں نے مزید عزم ظاہر کیا کہ سڑک کی تعمیر بھی اسی سلسلے کی ایک اہم کڑی ہے، انشاءاللہ آنے والے دو سال کے اندر سرگودھا کی تاریخ کو بدل کر رکھ دیں گے۔ عوام پرانے سرگودھا کے مسائل کو بھول جائیں گے اور ایک نیا اور ترقی یافتہ سرگودھا بنے گا۔