حیدرآباد:
بھارت کے شہر حیدرآباد (تلنگانہ) کے ایک مقامی لگژری ہوٹل کے کمرے سے 41 سالہ امریکی شہری کی پراسرار لاش برآمد ہوئی ہے، جس کے بعد پولیس اور قانون نافذ کرنے والے اداروں نے تفتیش کا آغاز کر دیا ہے۔پولیس کے مطابق متوفی کی شناخت کیلیفورنیا کے رہائشی مائیکل برائن لی (Michael Brian Lee) کے طور پر ہوئی ہے، جو اپنے کاروباری پارٹنر کے ساتھ کسی کاروباری سلسلے میں حیدرآباد آئے تھے اور گچی باؤلی کے علاقے میں واقع ایک ہوٹل (میریٹ ایگزیکٹو اپارٹمنٹس) میں مقیم تھے۔اطلاعات کے مطابق جب امریکی شہری نے ہوٹل کے عملے کی جانب سے فون کالز کا جواب نہیں دیا تو عملے نے شک کی بنیاد پر کمرے کا دروازہ کھولا جہاں وہ مردہ حالت میں پائے گئے۔ ہوٹل انتظامیہ کی اطلاع پر پولیس فوری طور پر موقع پر پہنچی اور لاش کو تحویل میں لے کر اسپتال منتقل کر دیا۔پولیس حکام کا کہنا ہے کہ ابتدائی طور پر ضابطے کی کارروائی کا آغاز کرتے ہوئے مشکوک موت کا مقدمہ درج کر لیا گیا ہے۔ موت کی اصل وجوہات (طبی مسئلہ یا دیگر اسباب) کا حتمی تعین پوسٹ مارٹم اور فرانزک رپورٹس موصول ہونے کے بعد ہی ہو سکے گا۔