کراچی :وزیر داخلہ سندھ ضیا الحسن لنجار نے معروف اور لیجنڈری گلوکارہ و آرٹسٹ حمیرہ چنا کی قیمتی گاڑی کراچی کے علاقے بہادرآباد چار مینار کے قریب سے چوری ہو جانے کے ناخوشگوار واقعے کا سخت نوٹس لے لیا ہے۔
صوبائی وزیر داخلہ نے اس سنگین واقعے کا فوری نوٹس لیتے ہوئے ایس ایس پی اے وی ایل سی (AVLC) اور ایس ایس پی ایسٹ سے اس کی تفصیلی رپورٹ طلب کر لی ہے، اور ہدایت کی ہے کہ اینٹی وہیکل لفٹنگ سیل تمام تر جدید تکنیکی اور سائنسی پہلوؤں کو بروئے کار لاتے ہوئے گاڑی چوروں اور اس میں ملوث گینگ کو جلد از جلد ٹریس کرے۔ دوسری جانب، متعلقہ ایس ایس پی کا کہنا ہے کہ گاڑی چوری ہونے کے اس واقعے کا باضابطہ مقدمہ درج کر لیا گیا ہے جبکہ ملزمان کی تلاش اور واقعے کی مزید تحقیقات کا عمل بھی تیزی سے جاری ہے۔
وزیر داخلہ سندھ ضیا الحسن لنجار نے اس عزم کا اظہار کیا کہ ملک و قوم کا نام روشن کرنے والے فنکار اور آرٹسٹ ہمارا قیمتی قومی اثاثہ ہیں، اور گلوکارہ حمیرہ چنا کے ساتھ پیش آنے والے اس ناخوشگوار واقعے پر انہیں ذاتی طور پر شدید احساس ہے۔ انہوں نے یقین دلایا کہ ملزمان کو قانون کے کٹہرے میں لانے اور چھینی گئی یا چوری شدہ گاڑی کی برآمدگی کے لیے تمام ضروری اقدامات ترجیحی بنیادوں پر اٹھائے جائیں گے۔
