غزہ:فلسطینیوں پر اسرائیلی فورسز کی بربریت اور جارحیت کا سلسلہ بدستور جاری ہے، اور حالیہ فضائی و زمینی حملوں کے نتیجے میں غزہ میں مزید کم از کم 5 فلسطینی شہید اور متعدد زخمی ہو گئے ہیں۔
غزہ کی سول ڈیفنس ایجنسی اور مقامی اسپتال کے ذرائع کے مطابق جنوبی غزہ کے علاقے رفح میں ایک اسرائیلی ڈرون حملے کے نتیجے میں 3 فلسطینی موقع پر ہی شہید اور متعدد زخمی ہو گئے۔ مقامی اسپتال میں اس حملے کے بعد 3 لاشیں اور 15 شدید زخمی منتقل کیے گئے، جن میں سے ایک زخمی دورانِ علاج زخموں کی تاب نہ لاتے ہوئے دم توڑ گیا، جس سے رفح میں شہادتوں کی تعداد میں اضافہ ہو گیا۔ اس کے علاوہ خان یونس کے علاقے میں کیے جانے والے ایک اور الگ حملے میں بھی ایک فلسطینی شہری شہید ہو گیا۔
عالمی خبر رساں ادارے اے ایف پی کے مطابق اسرائیلی فوج نے غزہ کے ان مختلف علاقوں میں حملے کیے جانے کی باضابطہ تصدیق کی ہے۔ یہ حملے ایسے وقت میں کیے گئے ہیں جب اسرائیل میں عام انتخابات کے ایک روز بعد سیاسی غیر یقینی کی صورتحال ہے اور کسی بھی سیاسی جماعت کو واضح کامیابی حاصل نہیں ہو سکی۔ غزہ کی وزارت صحت کے اعداد و شمار کے مطابق گزشتہ برس جنگ بندی کے نفاذ کے بعد سے اب تک جاری رہنے والی پرتشدد کارروائیوں میں 1,500 سے زائد فلسطینی شہید ہو چکے ہیں۔ یاد رہے کہ 7 اکتوبر 2023 کو حماس کی جانب سے اسرائیل پر کیے جانے والے حملوں میں 1,221 افراد ہلاک ہوئے تھے، جس کے بعد سے اسرائیل نے غزہ میں بڑے پیمانے پر تباہ کن فوجی کارروائی کا آغاز کیا تھا، اور وزارت صحت کے مطابق اس طویل جنگ میں اب تک شہید ہونے والے فلسطینیوں کی مجموعی تعداد 74,500 سے تجاوز کر چکی ہے۔
