نئی دہلی/امراوتی:
خلیج بنگال سے اٹھنے والا انتہائی شدید سمندری طوفان ‘ارنب’ بھارتی ریاست آندھرا پردیش کے ساحل سے ٹکرا گیا ہے، جس کے بعد ساحلی علاقوں میں 115 سے 150 کلومیٹر فی گھنٹہ کی رفتار سے طوفانی ہوائیں چل رہی ہیں اور موسلا دھار بارشوں کا سلسلہ جاری ہے۔ محکمہ موسمیات (IMD) کے مطابق طوفان کا مرکز نارسپور اور کاکیناڈا کے ساحلی علاقوں کے قریب ہے۔ طوفان کے اثرات کے باعث وشاکھاپٹنم، کاکیناڈا اور گردونواح کے اضلاع میں کئی درخت جڑ سے اکھڑ گئے ہیں، جب کہ متعدد علاقوں میں بجلی کا نظام درہم برہم ہو چکا ہے۔انتظامیہ کی جانب سے پہلے ہی ساحلی علاقوں سے ہزاروں افراد کو محفوظ مقامات پر منتقل کیا جا ہے۔ طوفان کے پیش نظر وشاکھاپٹنم اور دیگر متاثرہ شہروں کے لیے متعدد پروازیں معطل کر دی گئی ہیں، اور ماہی گیروں کو سمندر میں نہ جانے کی سخت ہدایت کی گئی ہے۔محکمہ موسمیات نے خبردار کیا ہے کہ طوفان کے باعث سمندر میں معمول سے بلند لہریں اٹھ سکتی ہیں، جس سے نشیبی علاقوں میں سیلابی خطرہ پیدا ہو گیا ہے۔ آندھرا پردیش کے علاوہ اوڈیشہ، تلنگانہ اور قریبی ریاستوں میں بھی شدید بارشوں کا الرٹ جاری کیا گیا ہے۔