عمان: اردن کے ایک گرجا گھر میں اس وقت کہرام مچ گیا جب ایک تدفین اور دعائیہ تقریب کے دوران نامعلوم مسلح افراد نے اندھا دھند فائرنگ کر دی۔ اس دلخراش واقعے کے نتیجے میں 7 افراد جاں بحق جبکہ 40 سے زائد شدید زخمی ہو گئے۔
بین الاقوامی خبر رساں اداروں اور مقامی ذرائع کے مطابق فائرنگ کا یہ واقعہ ایک چرچ میں اس وقت پیش آیا جب وہاں بڑی تعداد میں سوگوار اور عزیز و اقارب ایک جنازے میں شرکت کے لیے جمع تھے۔ اچانک ہونے والے اس حملے سے تقریب میں شدید خوف و ہراس پھیل گیا اور لوگوں نے اپنی جان بچانے کے لیے ادھر ادھر بھاگنا شروع کر دیا۔
واقعے کی اطلاع ملتے ہی سکیورٹی فورسز اور امدادی ٹیمیں فوری طور پر جائے وقوعہ پر پہنچ گئیں، جنہوں نے زخمیوں کو فوری طور پر قریبی اسپتالوں میں منتقل کیا۔ حکام کے مطابق کئی زخمیوں کی حالت تشویشناک ہے، جس سے ہلاکتوں میں اضافے کا خدشہ بھی ظاہر کیا جا رہا ہے۔
پولیس اور قانون نافذ کرنے والے اداروں نے علاقے کو گھیرے میں لے کر حملہ آوروں کی تلاش کے لیے بڑے پیمانے پر سرچ آپریشن شروع کر دیا ہے، تاہم اب تک حملے کے محرکات اور ملزمان کے حوالے سے تفصیلات سامنے نہیں آ سکیں۔ اس ہولناک واقعے پر مقامی اور عالمی سطح پر شدید غم و غصے کا اظہار کیا جا رہا ہے۔