سیالکوٹ (بیورو رپورٹ: سلیم احمد اعوان شیخو)
صوبائی وزیر محنت و افرادی قوت پنجاب محمد منشاء اللہ بٹ سے سیالکوٹ چیمبر آف کامرس کے صدر خاور حسین اور دیگر عہدیداران نے ان کے دفتر میں اہم ملاقات کی۔ ملاقات کے دوران سیالکوٹ کے صنعتی و کاروباری شعبے سے متعلق امور، محنت کشوں کی فلاح و بہبود اور صنعتی کارکنوں کو معیاری طبی سہولیات کی فراہمی کے اقدامات پر تفصیلی تبادلہ خیال کیا گیا۔اس موقع پر صوبائی وزیر محمد منشاء اللہ بٹ نے گفتگو کرتے ہوئے کہا کہ ورکرز کی صحت، فلاح و بہبود اور سماجی تحفظ حکومت پنجاب کی اولین ترجیحات میں شامل ہیں۔ انہوں نے اس بات پر زور دیا کہ صنعتی کارکن ملکی معیشت اور پیداواری سرگرمیوں میں کلیدی کردار ادا کرتے ہیں، اس لیے انہیں بہترین طبی سہولیات کی فراہمی یقینی بنانے کے لیے مؤثر اقدامات کیے جا رہے ہیں۔صوبائی وزیر نے مزید کہا کہ حکومت پنجاب محنت کش طبقے کے حقوق کے تحفظ اور ان کے معیارِ زندگی کو بلند کرنے کے لیے مکمل طور پر پرعزم ہے۔ انہوں نے اس عزم کا اظہار کیا کہ سیالکوٹ چیمبر آف کامرس اور محکمہ محنت کے درمیان باہمی تعاون کو مزید فروغ دے کر صنعتی کارکنوں کی فلاحی اسکیموں کو زیادہ مؤثر بنایا جائے گا۔ملاقات کے دوران سیالکوٹ چیمبر آف کامرس کے صدر خاور حسین نے موبائل سوشل سیکیورٹی ہیلتھ سروسز کے آغاز کو انتہائی خوش آئند قرار دیتے ہوئے کہا کہ یہ اقدام صنعتی کارکنوں کو ان کی دہلیز پر طبی سہولیات فراہم کرنے میں سنگِ میل کی حیثیت رکھتا ہے۔ انہوں نے کہا کہ موبائل ہیلتھ سروسز کے ذریعے محنت کش طبقے کو صحت کی سہولیات تک رسائی میں بڑی آسانی ہوگی، جو کہ کارکنوں کی فلاح و بہبود کے لیے ایک بہترین قدم ہے۔ملاقات کے آخر میں اس امر پر مکمل اتفاق کیا گیا کہ صنعتی شعبے اور متعلقہ سرکاری اداروں کے درمیان قریبی رابطہ اور تعاون محنت کشوں کو بہتر سہولیات کی فراہمی اور ان کے مسائل کے بروقت حل میں معاون ثابت ہوگا۔