سیالکوٹ (بیورو رپورٹ – سلیم احمد اعوان شیخو):
ڈپٹی کمشنر سیالکوٹ محمد اویس مشتاق کی خصوصی ہدایات پر اسسٹنٹ کمشنر سیالکوٹ صفدر شبیر نے گوہد پور اور نواں پنڈ کے علاقوں میں کارروائیاں کرتے ہوئے دو غیر قانونی پٹرول پمپس کو سربمہر کر دیا ہے۔ انتظامیہ کے مطابق ان پمپس کا قیام غیر قانونی طور پر عمل میں لایا گیا تھا جو کہ عوامی جان و مال کے لیے بڑا خطرہ بن سکتے تھے۔کارروائی کے دوران دونوں پمپس کو سیل کر کے متعلقہ ریکارڈ اور کیسز مزید قانونی کارروائی کے لیے محکمہ سول ڈیفنس کے حوالے کر دیے گئے ہیں۔ڈپٹی کمشنر محمد اویس مشتاق نے تمام متعلقہ افسران کو واضح ہدایات جاری کی ہیں کہ غیر قانونی پٹرول پمپس کے خلاف اس طرح کی کارروائیاں بلا تعطل جاری رکھی جائیں۔ انہوں نے اس عزم کا اعادہ کیا کہ شہریوں کے تحفظ کو ہر صورت یقینی بنایا جائے گا اور قوانین کی خلاف ورزی کرنے والوں کے خلاف کسی قسم کی رعایت کے بغیر سخت قانونی کارروائی عمل میں لائی جائے گی۔