سیالکوٹ (سلیم احمد اعوان شیخو):
اسسٹنٹ کمشنر ڈسکہ سعدیہ جعفر نے مریم نواز ہیلتھ کلینک گوئندکے کا تفصیلی دورہ کیا، جہاں انہوں نے مرکزِ صحت کے مختلف شعبوں کا معائنہ کیا اور مریضوں کو فراہم کی جانے والی طبی سہولیات کا قریب سے جائزہ لیا۔دورے کے دوران اسسٹنٹ کمشنر نے عملے کی حاضری، ادویات کی دستیابی، اور مجموعی انتظامی امور کا بالاستیعاب جائزہ لیا۔ انہوں نے مرکز صحت میں صفائی ستھرائی کی صورتحال کو تسلی بخش قرار دیا اور ہدایت کی کہ صفائی کے اس معیار کو ہر صورت برقرار رکھا جائے۔ اسسٹنٹ کمشنر نے ہسپتال میں آنے والے مریضوں سے بھی ملاقات کی اور ان کو ملنے والی طبی سہولیات کے حوالے سے دریافت کیا۔طبی عملے کو ہدایات دیتے ہوئے ان کا کہنا تھا کہ سرکاری مراکزِ صحت میں عوام کو علاج معالجے کی بہترین اور معیاری سہولیات کی فراہمی حکومت کی اولین ترجیح ہے، اور اس ضمن میں کسی قسم کی کوتاہی برداشت نہیں کی جائے گی۔