سانگھڑ (رپورٹ: اشفاق سلہری)
سانگھڑ کے علاقے کھاھی میں ایک نوجوان کے قتل کے خلاف لگایا جانے والا دھرنا دوسری رات بھی جاری ہے۔ مقتول کا ضعیف والد اور بھائی کل سے ایمبولینس میں میت کے ساتھ دھرنے میں بیٹھے ہیں، جبکہ ورثاء اور علاقہ مکین میت کو سامنے رکھ کر سراپا احتجاج ہیں۔ ایس ایس پی شہید بینظیرآباد، سمیر نور چنا اور مظاہرین کے درمیان کئی گھنٹے تک جاری رہنے والے مذاکرات بے نتیجہ ختم ہو گئے۔ مقتول کے ورثاء نے واضح کیا ہے کہ جب تک اصل ملزمان کو گرفتار نہیں کیا جاتا، دھرنا جاری رہے گا۔ میڈیا سے بات چیت کرتے ہوئے ایس ایس پی سمیر نور چنا نے کہا کہ دھرنے کے شرکاء کو یقین دلایا گیا ہے کہ بہت جلد اصل ملزمان کو قانون کی گرفت میں لے لیا جائے گا۔ انہوں نے مزید بتایا کہ پولیس نے کچھ مشتبہ افراد کو حراست میں لے کر تفتیش شروع کر دی ہے، جبکہ تفتیش سے متعلق کچھ اہم چیزیں ورثاء کے ساتھ بھی شیئر کی گئی ہیں جنہیں فی الحال میڈیا کے سامنے ظاہر نہیں کیا جا سکتا۔