ٹیکساس
آئی سی سی مینز کرکٹ ورلڈ کپ لیگ 2 (ون ڈے) کے اہم مقابلے میں امریکہ کی کرکٹ ٹیم نے شاندار کارکردگی کا مظاہرہ کرتے ہوئے نمیبیا کو 4 وکٹوں سے شکست دے دی۔ گرینڈ پریری کرکٹ اسٹیڈیم، ٹیکساس میں کھیلے گئے اس میچ میں نمیبیا نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں 9 وکٹوں کے نقصان پر 298 رنز بنائے۔ جواب میں امریکہ نے 299 رنز کا ہدف 48.5 اوورز میں 6 وکٹوں کے نقصان پر حاصل کر لیا۔نمیبیا کی جانب سے اوپننگ بیٹر مائیکل وان لنگین نے بہترین بیٹنگ کرتے ہوئے 121 گیندوں پر 11 چوکوں کی مدد سے 124 رنز کی اننگز کھیلی۔ کپتان گیرہارڈ ایراسمس نے بھی جارحانہ کھیل کا مظاہرہ کیا اور صرف 45 گیندوں پر 9 چوکوں اور 3 چھکوں کے ساتھ 76 رنز بنائے۔امریکہ کی جانب سے فاسٹ بولر احسان عادل نے شاندار بولنگ کرتے ہوئے 8 اوورز میں 41 رنز دے کر 4 وکٹیں حاصل کیں، جبکہ شیہان جیسوریا نے 3 وکٹیں حاصل کیں۔299 رنز کے ہدف کے تعاقب میں امریکی ٹیم کا آغاز مضبوط رہا۔ کپتان اور وکٹ کیپر بیٹر مونانک پٹیل نے ذمہ دارانہ بیٹنگ کرتے ہوئے 100 گیندوں پر 14 چوکوں کی مدد سے 108 رنز کی میچ وننگ اننگز کھیلی۔ان کا ساتھ شیہان جیسوریا (74 رنز) اور سمت پٹیل (50 رنز) نے بھرپور انداز میں دیا، جس کی بدولت امریکی ٹیم نے 7 گیندیں قبل ہی ہدف حاصل کر لیا۔ نمیبیا کی جانب سے نکول لوفٹی ایٹن اور جے جے سمتھ نے 2، 2 وکٹیں حاصل کیں۔میچ میں بہترین سینچری اسکور کرنے اور ٹیم کی فتح میں اہم کردار ادا کرنے پر امریکہ کے کپتان مونانک پٹیل کو ‘پلیئر آف دی میچ’ قرار دیا گیا۔