سکھر (رپورٹ: عبد الرحمان راجپوت)
ریلوے انتظامیہ نے سکھر کی یو سی آدم شاہ کے علاقے رتی لائن کے مکینوں کو گھر خالی کرنے کے نوٹس جاری کر دیے ہیں، جس کے بعد علاقہ مکینوں نے ڈی ایس ریلوے کے خلاف شدید احتجاج کرتے ہوئے شمس آباد روڈ پر ٹائر جلا کر ٹریفک معطل کر دی۔تفصیلات کے مطابق سکھر ڈی ایس ریلوے آفس انتظامیہ کی جانب سے رتی لائن کے مکینوں کو مکانات خالی کرنے کے نوٹس دیئے گئے تھے۔ نوٹس کی مدت ختم ہونے پر ریلوے کا عملہ پولیس اور لیڈی پولیس اہلکاروں کی بھاری نفری کے ہمراہ علاقے میں پہنچا، جہاں انہیں گھروں میں داخل ہوتے وقت مقامی مکینوں کی شدید مزاحمت کا سامنا کرنا پڑا۔مظاہرین، جن میں مائی لبنیٰ، صداقت علی راجپوت، سلمان علی، ریحان علی، اسد، توقیر اور دیگر شامل تھے، نے شمس آباد روڈ پر رکاوٹیں کھڑی کر کے احتجاج کیا۔ میڈیا سے گفتگو کرتے ہوئے مظاہرین کا کہنا تھا کہ وہ برسوں سے اس علاقے میں مقیم ہیں۔ سکھر میونسپل کارپوریشن نے اس علاقے کو باقاعدہ کچی آبادی قرار دے کر انہیں زمین کے ٹائٹل جاری کیے تھے، جنہیں ریلوے انتظامیہ نے بھی تسلیم کیا تھا، لیکن اب 50 سے 60 خاندانوں کو زبردستی بے دخل کیا جا رہا ہے۔مظاہرین نے واضح کیا کہ وہ کسی بھی صورت اپنے مکانات خالی نہیں کریں گے۔ انہوں نے وفاقی وزیر ریلوے، وزیر اعلیٰ سندھ، گورنر سندھ اور میئر سکھر سے فوری مداخلت کی اپیل کرتے ہوئے مطالبہ کیا ہے کہ انہیں زمین کے مالکانہ حقوق لیز پر فراہم کر کے انصاف دیا جائے۔