گوجرانوالہ: وزیراعلیٰ پنجاب مریم نواز شریف نے گوجرانوالہ میں پاکستان مسلم لیگ (ن) کے دیرینہ اور مخلص رہنما، سابق ایم این اے مرحوم بشیر محمود ورک کی رہائش گاہ کا خصوصی دورہ کیا اور ان کے اہل خانہ سے گہرے دکھ اور تعزیت کا اظہار کیا۔
وزیراعلیٰ مریم نواز شریف نے مرحوم کی اہلیہ، صاحبزادے راشد بشیر ورک، بیٹیوں اور دیگر سوگواران سے ملاقات کی، فاتحہ خوانی کی اور مرحوم کی مغفرت اور بلندیِ درجات کے لیے دعا کی۔
اس موقع پر گفتگو کرتے ہوئے وزیراعلیٰ مریم نواز شریف نے مرحوم بشیر محمود ورک کی ملک، قوم اور پارٹی کے لیے گراں قدر خدمات کو زبردست خراجِ تحسین پیش کیا۔ انہوں نے کہا کہ بشیر محمود ورک کے انتقال سے پارٹی قائد محمد نواز شریف ایک مخلص ساتھی اور وہ خود ایک مشفق بزرگ کی شفقت سے محروم ہو گئی ہیں۔ انہوں نے کہا کہ مرحوم نے ہر اچھے برے وقت میں ن لیگ سے اپنی وفا نبھائی اور ان کے سیاسی پائے استوار میں کبھی لغزش نہیں آئی، گوجرانوالہ کے عوام اور کارکنان کے لیے ان کی خدمات کو ہمیشہ یاد رکھا جائے گا۔
وزیراعلیٰ نے امید ظاہر کی کہ بشیر محمود ورک کے صاحبزادے راشد بشیر ورک اپنے والد کی روشن سیاسی وراثت کو بھرپور انداز میں آگے بڑھائیں گے۔ مرحوم کے اہل خانہ اور راشد ورک نے مشکل وقت میں ڈھارس بندھانے پر وزیراعلیٰ اور قائدِ نواز شریف کا تہہ دل سے شکریہ ادا کیا۔
گوجرانوالہ آمد کے دوران وزیراعلیٰ مریم نواز شریف نے رہائش گاہ پر موجود ارکان اسمبلی، ٹکٹ ہولڈرز اور پارٹی رہنماؤں سے بھی فرداً فرداً ملاقات کی۔ وہ خود چل کر ہر کارکن کی نشست تک گئیں، ان کی خیریت دریافت کی اور علاقے کے سیاسی امور، ترقیاتی تجاویز اور درپیش مسائل کے بارے میں تفصیلی تبادلہ خیال کیا