لاہور: صوبائی وزیر اطلاعات پنجاب عظمیٰ بخاری نے کہا ہے کہ وزیراعلیٰ مریم نواز شریف کینسر کے موذی مرض کے علاج کے ساتھ ساتھ فالج (سٹروک) کے مریضوں کے بروقت علاج کے لیے تاریخی اور فیصلہ کن اقدامات کر رہی ہیں، جن کے نتیجے میں اب تک سیکڑوں قیمتی جانیں بچائی جا چکی ہیں۔
لاہور میں پریس کانفرنس اور جاری کردہ بیان میں صوبائی وزیر اطلاعات کا کہنا تھا کہ پنجاب کی تاریخ میں پہلی بار صوبے بھر میں باقاعدہ سٹروک سینٹرز قائم کیے جا رہے ہیں۔ انہوں نے انکشاف کیا کہ وزیراعلیٰ مریم نواز کے بروقت اور مؤثر اقدامات کی بدولت اب تک فالج کے شکار 336 مریضوں کی زندگیاں کامیابی سے بچائی گئی ہیں۔
عظمیٰ بخاری نے تفصیلات بتاتے ہوئے کہا کہ پنجاب بھر میں اس وقت 40 پرائمری سٹروک سینٹرز مکمل طور پر فنکشنل ہو چکے ہیں، جبکہ وزیراعلیٰ نے مزید 17 سٹروک سینٹرز کو رواں سال دسمبر تک فعال کرنے کی سخت ڈیڈ لائن مقرر کر دی ہے۔ انہوں نے بتایا کہ تمام سٹروک سینٹرز میں فالج کے ہنگامی علاج کے لیے قیمتی ترین ‘ٹی این کے’ (TNK) انجیکشن وافر مقدار میں دستیاب ہیں، جہاں کل ملا کر 710 انجیکشنز موجود ہیں۔
صوبائی وزیر نے اس بات پر زور دیا کہ ان جدید طبی سہولیات کی فراہمی کے بعد اب فالج کے کسی بھی متاثرہ مریض کو علاج کی غرض سے بڑے شہروں کا مہنگا رخ کرنے کی ضرورت نہیں پڑے گی، کیونکہ مریم نواز حکومت پنجاب کے شہریوں کو ان کی دہلیز پر علاج کی بہترین سہولیات فراہم کر رہی ہے۔
عظمیٰ بخاری کا مزید کہنا تھا کہ پنجاب حکومت صحت کے شعبے میں انقلابی اقدامات اٹھا رہی ہے، یہی وجہ ہے کہ اب دوسرے صوبوں سے بھی لوگ علاج کروانے کے لیے پنجاب کا رخ کرتے ہیں۔ انہوں نے فخر سے بتایا کہ اس وقت پنجاب کے تمام سرکاری ہسپتالوں میں مریضوں کو نہ صرف مفت ادویات فراہم کی جا رہی ہیں بلکہ تمام طبی ٹیسٹ بھی بالکل مفت کیے جا رہے ہیں۔
پنجاب میں پہلی بار سٹروک سینٹرز کا قیام، 336 افراد کی زندگیاں بچا لی گئیں، عظمیٰ بخاری
