پیرس فیشن ویک: سرخ بال اور شاہانہ انداز، ایشوریہ رائے کے جلووں نے سب کو سحر زدہ کر دیا

پیرس (ویب ڈیسک): دنیا کے معتبر ترین فیشن ایونٹس میں شمار ہونے والے ‘پیرس فیشن ویک’ میں عالمی شہرت یافتہ بالی ووڈ اداکارہ اور سابق مس ورلڈ ایشوریہ رائے بچن نے اپنے منفرد انداز اور شاہانہ روپ سے شائقین کی تمام تر توجہ حاصل کر لی۔

پیرس فیشن ویک کے ریمپ پر قدم رکھتے ہی ایشوریہ رائے کے دلکش انداز نے تمام حاضرین کو سحر زدہ کر دیا۔ اس موقع پر ان کا سرخ بالوں (Red Hair) کا نیا اور بولڈ لک، شاہانہ ڈریس اور پراعتماد انداز فیشن کی دنیا میں موضوعِ بحث بنا ہوا ہے۔

ایونٹ کے دوران ایشوریہ رائے کے نئے ہیئر سٹائل اور باوقار لباس نے ان کی شخصیت کو مزید نمایاں کیا۔ ریمپ واک کے دوران اداکارہ کے حاکمانہ انداز، دلکش مسکراہٹ اور فلائنگ کسز نے مداحوں کے دل جیت لیے۔

سوشل میڈیا پر ایشوریہ رائے کی پیرس فیشن ویک کی تصاویر اور ویڈیوز تیزی سے وائرل ہو رہی ہیں، جہاں فیشن ناقدین اور مداح ان کے اس انداز کی بے حد تعریف کر رہے ہیں۔ مداحوں کا کہنا ہے کہ ایشوریہ رائے نے ایک بار پھر ثابت کر دیا ہے کہ وہ عالمی فیشن کی دنیا میں ایک منفرد اور الگ مقام رکھتی ہیں۔