اجین (نیوز ڈیسک):
بھارتی ریاست مدھیہ پردیش کے شہر اجین میں شاہی مسجد کی انتظامی کمیٹی نے کسی بھی ممکنہ تنازع سے بچنے اور قانونی و انتظامی امور کو مدنظر رکھتے ہوئے مسجد کا متنازع حصہ خود ہی ہٹانے کا کام شروع کر دیا ہے۔
اس معاملے پر علاقے میں پیدا ہونے والے تناؤ اور سوشل میڈیا پر اشتعال انگیزی کے پیش نظر پولیس اور مقامی انتظامیہ نے سخت اقدامات کیے ہیں۔ پولیس ذرائع کے مطابق امن و امان میں خلل ڈالنے اور پرتشدد صورتحال پیدا کرنے کے الزام میں اب تک 15 افراد کو گرفتار کیا جا چکا ہے۔
علاوہ ازیں، سوشل میڈیا پر غیر تصدیق شدہ معلومات اور افواہیں پھیلانے کے جرم میں 5 معروف سوشل میڈیا انفلوئنسرز کے خلاف بھی مقدمہ درج کر لیا گیا ہے۔ مقامی پولیس نے شہریوں سے امن برقرار رکھنے اور سوشل میڈیا پر کسی بھی قسم کا اشتعال انگیز مواد شیئر نہ کرنے کی اپیل کی ہے۔