کراچی (نیوز ڈیسک):
سندھ کے محکمہ آبپاشی میں فنڈز کے استعمال اور مالی امور پر سنگین سوالات اٹھ گئے ہیں۔ ذرائع کے مطابق صوبے میں سیلابی صورتحال پیدا ہوئے بغیر ہی محکمہ آبپاشی نے امکانی خطرات کی روکتھام اور ہنگامی اقدامات کے نام پر 77 کروڑ روپے کی بھاری رقم خرچ کر ڈالی ہے۔
رپورٹ کے مطابق متعلقہ حکام کی جانب سے کاغذات میں بندھ اور نالوں کی مرمت و دیکھ بھال اور سیلابی پانی روکنے کی تدابیر کے مد میں کروڑوں روپے کے اخراجات ظاہر کیے گئے ہیں، جبکہ عینی شاہدین اور مقامی حلقوں کا کہنا ہے کہ میدان میں کوئی پیشگی یا خاطر خواہ کام نظر نہیں آیا۔
اس معاملے پر عوامی و سیاسی حلقوں کی جانب سے شدید تشویش کا اظہار کیا جا رہا ہے اور مطالبہ کیا جا رہا ہے کہ 77 کروڑ روپے کے اخراجات کا فوری آڈٹ کروا کر متعلقہ ذمہ داروں کا تعین کیا جائے اور شفاف تحقیقات کی جائیں۔