شمالی بحیرہ عرب میں لائیو ویپن فائرنگ، میزائل نے مقررہ ہدف کو انتہائی درستگی سے نشانہ بنایا: آئی ایس پی آر
پاک بحریہ نے اپنی زیرِ آب دفاعی صلاحیتوں کو مزید مضبوط اور موثر بناتے ہوئے حال ہی میں شامل کی گئی جدید آبدوز ’پی این ایس / ایم ہنگور‘ سے پہلی لائیو ویپن فائرنگ کا کامیاب مظاہرہ کیا ہے۔پاک فوج کے شعبہ تعلقات عامہ (آئی ایس پی آر) کے مطابق یہ اہم تجربہ شمالی بحیرہ عرب میں انجام دیا گیا۔ فائرنگ کے دوران آبدوز پی این ایس ہنگور نے طویل فاصلے تک مار کرنے والا اینٹی شپ کروز میزائل داغا، جس نے پیشگی طے شدہ ہدف کو انتہائی درستگی سے نشانہ بنایا۔ آئی ایس پی آر کا کہنا ہے کہ لائیو ویپن فائرنگ کے اس شاندار مظاہرے سے پی این ایس ہنگور کے تمام ویپن سسٹمز، جدید سنسرز اور جنگی تیاری کی کامل توثیق ہو گئی ہے، جو پاک بحریہ کی زیرِ آب جنگی صلاحیتوں میں ایک نئا اور اہم سنگِ میل ثابت ہوگا۔ چیف آف دی نیول اسٹاف ایڈمرل نوید اشرف نے اس لائیو ویپن فائرنگ کے مرحلے کا بذاتِ خود مشاہدہ کیا اور آبدوز کی تکنیکی و جنگی صلاحیت سمیت عملے کی اعلیٰ پیشہ ورانہ مہارت اور جذبے کی بھرپور تعریف کی۔نیول چیف نے اس موقع پر گفتگو کرتے ہوئے کہا کہ "زیرِ آب جنگی صلاحیتوں میں مسلسل اضافہ اور جدید تکنیک کا استعمال پاک بحریہ کی آپریشنل تیاری اور مضبوط دفاعی حکمتِ عملی کے لیے ناگزیر ہے”۔ انہوں نے اس عزم کا اعادہ کیا کہ پاک بحریہ پاکستان کی سمندری سرحدوں کے دفاع اور خطے میں بحری امن و استحکام کے لیے ہر وقت تیار ہے۔
وزیرِ اعظم شہباز شریف سمیت اعلیٰ سیاسی اور عسکری قیادت نے اس کامیاب تجربے پر پاک بحریہ کے سربراہ، سائنسدانوں، انجینئرز اور پی این ایس ہنگور کے جملہ عملے کو مبارکباد پیش کی ہے۔