خوشاب (راجہ نورالہی عاطف سے )
ڈپٹی کمشنر خوشاب ڈاکٹر جہانزیب حسین لابر نے جوہرآباد جنرل بس اسٹینڈ میں قائم وزیرِ اعلیٰ پنجاب الیکٹرک گرین بسز ٹرمینل کا دورہ کیا اور وہاں شہریوں کو فراہم کی جانے والی سفری سہولیات، بسز کے چارجنگ پوائنٹس، مسافروں کو سفری ٹوکن کے اجراء کے طریقہ کار اور دیگر انتظامات و ریکارڈ کا تفصیلی جائزہ لیا۔ اس موقع پر سیکرٹری آر ٹی اے ملک محمد طاہر، گرین الیکٹرک بسز ٹرمینل کے منیجرز اور متعلقہ محکموں کے افسران بھی موجود تھے۔ سیکرٹری آر ٹی اے ملک محمد طاہر اور ٹرمینل منیجرز نے ڈپٹی کمشنر خوشاب کو ٹرمینل کے انتظامی امور، بسز کی آپریشنل صورتحال اور شہریوں کو فراہم کی جانے والی سہولیات کے حوالے سے بریفنگ دی۔ سیکرٹری آر ٹی اے نے بتایا کہ گرین الیکٹرک بسز کے ذریعے ضلع خوشاب کے شہریوں کو مفت، آرام دہ اور ماحول دوست سفری سہولت فراہم کی جا رہی ہے۔ انہوں نے مزید بتایا کہ ٹرمینل کی بہتری اور مسافروں کو مزید سہولیات کی فراہمی کے لیے جلد اقدامات کیے جائیں گے، جبکہ ٹرمینل کے چاروں اطراف پختہ دیوار کی تعمیر بھی کی جائے گی۔ ڈپٹی کمشنر خوشاب ڈاکٹر جہانزیب حسین لابر نے ہدایت کی کہ گرین الیکٹرک بسز ٹرمینل کی بہتری، صفائی ستھرائی اور شہریوں کو فراہم کی جانے والی دیگر سہولیات سے متعلق ترقیاتی و انتظامی امور پر بلا تاخیر کام شروع کیا جائے تاکہ عوام کو بہتر سفری سہولیات میسر آ سکیں۔ بعد ازاں ڈپٹی کمشنر خوشاب نے سرگودھا روڈ، خیرپور اور ملحقہ علاقوں کا بھی دورہ کیا اور پنجاب ڈویلپمنٹ پروگرام اور بیوٹیفکیشن پلان کے تحت دریائے جہلم کے قریب گرین بیلٹ اور پارک کے لیے مختص جگہ کا معائنہ کیا۔ ڈپٹی کمشنر نے متعلقہ افسران سے مجوزہ گرین بیلٹ اور پارک کے منصوبے کے حوالے سے تفصیلات دریافت کیں۔ انہوں نے کہا کہ دریائے جہلم کے قریب گرین بیلٹ اور پارک کے قیام کا مقصد شہر کی خوبصورتی میں اضافہ، ماحول کو بہتر بنانا اور شہریوں کو صحت مند و معیاری سیروتفریح کے مواقع فراہم کرنا ہے۔ اس موقع پر چیف ایگزیکٹو آفیسر ضلع کونسل بھی موجود تھے۔