عمرکوٹ (رپورٹ: ڈاکٹر ایم لال واگھانی – بیورو چیف): کوٹ غلام محمد (جیمس آباد) میں پاکستان فیملی بچت سیل مارٹ کا شاندار افتتاح کر دیا گیا۔ افتتاح معروف سماجی شخصیت اور رحیمدانی اکیڈمی کے صدر رسول بخش رحیمدانی، عمران طور راجپوت، رانا ارحم، شام وسی اور دیگر معزز شخصیات نے مشترکہ طور پر کیا۔
افتتاحی تقریب میں شہریوں اور مختلف شعبہ ہائے زندگی سے وابستہ افراد نے بڑی تعداد میں شرکت کی۔ اس موقع پر صحافیوں سے گفتگو کرتے ہوئے معروف سماجی شخصیت رسول بخش رحیمدانی نے کہا کہ پاکستان فیملی بچت سیل مارٹ کے قیام کا بنیادی مقصد عوام کو روزمرہ استعمال کی اشیاء سستے داموں فراہم کرنا ہے، تاکہ عام افراد اور متوسط طبقے سے تعلق رکھنے والے خاندان اپنی ضروریات کی اشیاء مناسب قیمتوں پر خرید سکیں۔
انہوں نے کہا کہ عوام کو خریداری کی بہتر سہولیات فراہم کرنے کے ساتھ ساتھ خاندانوں کی بچت کو فروغ دینا بھی اس منصوبے کا اہم مقصد ہے۔ رسول بخش رحیمدانی نے مزید بتایا کہ پاکستان فیملی بچت سیل پروجیکٹ کو سندھ کے مختلف اضلاع تک وسعت دینے کے لیے اقدامات کیے جا رہے ہیں، جس سے مزید شہریوں کو مناسب قیمتوں پر معیاری اشیاء کی خریداری کی سہولت میسر آ سکے گی۔
افتتاحی تقریب کے دوران مہمانوں نے سیل مارٹ کے مختلف شعبوں کا دورہ کیا اور وہاں رکھی گئی اشیاء کا جائزہ لیا۔ تقریب کے اختتام پر ملک کی سلامتی، خوشحالی اور عوام کی بھلائی کے لیے خصوصی دعا کی گئی، جس کے بعد شرکاء اور مہمانوں میں مٹھائی بھی تقسیم کی گئی۔