پشاور/نوشہرہ (رپورٹ: انورزیب خان)
ایڈیشنل اسسٹنٹ کمشنر-II نوشہرہ فاطمہ خالق نے تحصیل آفس نوشہرہ اور سروس ڈیلیوری سنٹر (SDC) کا اچانک دورہ کر کے انتظامی امور، عملے کی حاضری اور عوامی سہولیات کا جائزہ لیا۔ اے سی-II نے دفاتر کا دورہ کر کے فائل ورک، عملے کا حاضری رجسٹر اور ریکارڈ روم چیک کیا۔
عملے کو تمام ریکارڈ اپ ڈیٹ رکھنے اور بروقت حاضری یقینی بنانے کی سخت ہدایت کی۔ انہوں نے وہاں موجود سائلین سے فراہم کی جانے والی خدمات کا احوال دریافت کیا، ان کے مسائل سنے اور عملے کو شکایات فوراً حل کرنے کے احکامات جاری کیے۔
ریکارڈ روم میں جاری مرمتی کام کا معائنہ کرتے ہوئے اسے جلد اور معیاری طریقے سے مکمل کرنے کی ہدایت دی گئی۔
موقع پر موجود اسٹامپ فروشوں اور وثیقہ نویسوں کا معائنہ کیا گیا جن کے تمام معاملات اور ریکارڈ درست پائے گئے۔ایڈیشنل اسسٹنٹ کمشنر کا کہنا تھا کہ عوامی سہولیات میں شفافیت اور بہتری لانے کے لیے انتظامیہ کا نگرانی کا یہ عمل مسلسل جاری رہے گا۔
