نئے صوبوں کا قیام : پارلیمنٹ ہی حتمی فیصلہ کرے گی، رانا ثناء اللہ

    لاہور:مسلم لیگ ن کے سینئر رہنما اور وزیراعظم کے مشیر رانا ثناء اللہ نے ملک میں نئے صوبوں کے قیام کے معاملے پر واضح کیا ہے کہ اس حساس ترین موضوع پر کوئی بھی حتمی فیصلہ صرف اور صرف پارلیمنٹ ہی کرے گی، اور نئے انتظامی یونٹس کے حوالے سے تمام تر بحث اور مشاورت کا اصل فورم بھی پارلیمنٹ ہی ہے۔


    لاہور میں سینئر صحافیوں سے غیر رسمی گفتگو کرتے ہوئے رانا ثناء اللہ کا کہنا تھا کہ نئے صوبوں کے معاملے پر مسلم لیگ ن کے اندرونی حلقوں میں مشاورت کا سلسلہ جاری ہے، اور اس ضمن میں عوام کی رائے کو بھی اہمیت دی جائے گی۔ انہوں نے واضح کیا کہ نئے یونٹس بنانے کا یہ معاملہ تاحال باضابطہ طور پر کابینہ میں نہیں اٹھایا گیا، اور ملک میں کسی بھی ریفرنڈم یا آئینی تبدیلی کا حتمی فیصلہ حکومت اکیلے نہیں بلکہ پارلیمنٹ کا مشترکہ اجلاس کرے گا۔
    پی ٹی آئی کے ممکنہ احتجاج اور دھرنے کی کال پر کڑے تنقیدی نشتر چلاتے ہوئے رانا ثناء اللہ نے کہا کہ تحریک انصاف ایک بار پھر مسلح ہو کر اسلام آباد پر حملہ کرنے اور چڑھ دوڑنے کی تیاری کر رہی ہے، لیکن حکومت ان کے اس ناپاک عزائم کو ناکام بنا دے گی اور ان کا یہ احتجاج بالکل ’ٹکے ٹوکری‘ ثابت ہوگا۔ انہوں نے دعویٰ کیا کہ اپوزیشن کے پاس اب عوامی حمایت ختم ہو چکی ہے اور وہ صرف افراتفری پھیلانا چاہتی ہے۔ ایک سوال کے جواب میں انہوں نے بتایا کہ وفاقی وزیر شیخ قیصر کی ہر دوسرے روز وزیراعظم سے باقاعدہ ملاقات ہوتی ہے اور حکومتی امور خوش اسلوبی سے چلائے جا رہے ہیں۔

    Related Posts